«Машук» форуме ГIалгIайчен ди дIадихьар

Къилбаседа-Кавказе гIолла дIахьош йолча «Машук» яхача къоначар форуме ГIалгIайчен хетадаь ди дIадихьар. Укхаза бийха лерхIаме хьаьший бар ГIалгIайчен Мехкда Евкуранаькъан Юнус-Беки, РФ Паччахьалкхен Дума депутат ГIазгиренаькъан ЮшаIи. Форумхошца вIашагIа а кхийтта, цига гIалгIай халкъа оамал, гIулакх, Iадат хьахьокхаш йолча выставкашка гIолла чакхбайлар уж.
ГIалгIайчен Культурахи Архивни гIулакхахи йолча министерствос Iалашъяь выставка яр гулбеннарашта гIалгIай къаман дахари культураи гойташ. ХIаьта Малсаганаькъан Тухана цIерагIа йолча ГIалгIайчен мохктохкара музеяс ГIалгIай мехка тархьар довзийтар. Иштта «Машука» доакъашхой аьттув хилар къаман дувхар, тханах даь истингаш, кIувсаш, къаьнара герзаш, топпарах, дахчах, кхерах я пхьегIаш, иштта кхы а дукха хIама бIаргаго а довза а. ХIаьта Суртай искусства музеяс «ГIалгIайче – лакхача лоаман мохк» яха экспозици енаяр. Цул совгIа машукахошта кийчья халхарахи, пхьоаллехи лаьца мастер-класса яр цига, иштта ГIалгIай мехкара минеральни хий, модз, сомаш, шурах даь даараш дар гулбеннарашта дохьалдена.


ГIалгIайчен вахара хьал дайзачул тIехьагIа форума доакъашхошца вIашагIкхетар хилар лерхIамеча хьаьший. Къамаьл додача юкъа кагирхоша дийцар форуме чакхъяха чам болаш шоаш енача шоай уйлаех.
«Машук» форум йолаелчахой цхьанне а ца баьккхача тайпара лакха балл а баьккха «Машук-20I7» форума лауреат хиннача Калиматнаькъан Адама йовзийтар Мехкдаьна «Школа Ресайклинга» яха ший проект. Из хьожаяь я экологически хьал тоадарца, пластика хIамаех пайда беш, уж дIа-хьа йоахаш йола кагий пхьоалеш Iалашъера. ХIаьта совгIат лаьрхIа Баматгире Юнус-Бека Адама белар къоастаяьча пластиках баь планшет яха каьхаташта к1алха лелабу папка. Шийна деннача совгIатах баркал а аьнна, дIахойодача хана ший вIашагIкхетарашка из папка лелабергба ше аьлар Мехкдас.


Форум «Машук» юкъара болх лелабеча кагийча наха, шоай говзал гучаяьккха а халкъа пайда бе а дика моттиг я. Из дIахьош я август бетта 10-24 деношка Пятигорске, «Добровольчество» и «Гражданское общество» яхача шин аргIах. Цига дакъалоацаш, кхыча мехкашкара санна ГIалгIай мехкара а дукха кагирхой ба.

Матенаькъан Илез

№124 (12060), шинара, 21 август, 2018 шу Вторник, 21 августа 2018 года

Добавить комментарий

Ваш e-mail не будет опубликован. Обязательные поля помечены *