Вай кхоане Iалашъеш

Татарстанера баьхкача лораша 200 совгIа долча ГIалгIай мехкарча берашта эттIадеш дарбаш даьд. ГIалгIайчени Татарстанаи УнахцIенон министерствоша баьча бартах, Казанера баьхкача лораша кхаь шера гIалгIай лорал-говзанчаш Iомабеш болх дIабихьаб. Цу хана чухьа Казанера баьхкача лораша доал дирца 200 совгIа бер эттадаьд халача потологи лазар долча унахошта дарба деш. Иштта 1000 совгIа къаьст-къаьста унахой а тIаийцаб.

Укх деношка ГIалгIайчен Мехкдас Евкуранаькъан Баматгире Юнус-Бека ше волча балха цIагIа хьаьший тIа а ийца вIашагIкхетар дIадихьар профессоро, берий хирург, андролог, уролог волча Акрамов Наилацеи, хирург волча Подшивалин Андреяцеи. Белгалде деза, вай мехкара лораш Iомабеш цхьана болх бе уж пхезлагIа баьхка болга. ВIашагIкхетаре иштта дакъалоацаш бар ГIалгIайчен унахцIенон министр Iарапханаькъан Мареми, Мехка берий клиникан больница керттера лор Балайнаькъан Мухьмад-Башири.
УнахцIенон министра Марема яхачох хIанзле хоржам баь зIамигача унахой тоаба белгалъяьккхай геттара медицина гIо эшаш болчарга хьожаргболаш. «ГIалгIайче хьакхоачаше болх дIабола а баь 40 унахо тIаэцарца консультаци е аьттув баьннаб вай хьаьший», — аьнна белгалдир министро Марема.
Лораш вай мехка хургболаш ба август бетта 24 ди чакхдаллалца, цу хана чухьа гIалгIай мехкарча лорашца цхьана 30 совгIа бер эттIадеш дарба де лерхI цар. Iарапханаькъан Марема аьлар, иштта арара лораш тIакхувларца ГIалгIайче из болх дIахьош йола массехк шу да, цудухьа доазол арахьа дIа а ца ухаш укхаза вай мехка халача лазарашта дохьал къовсам лоаттабеш дарбаш де аьттув боал вай лорий, аьнна.
Акрамов Наила белгалдир, хIара шоаш хьа мел баьхкача хана гIалгIай лорий балхагахьа йола говзал лакхлуш хилар а, мехка бахархой дарбанхошкахьа бола тешам совбоалаш хилар а, наьха хьашташ кхоачашдирах йола оагIо теркалъеш мехка болх беш хилар а, арахьа дIакхувла безаш бола унахой тIа-тIа кIезигагIа хулаш хилар а.
Евкуранаькъан Юнус-Бека ше волча тIаийцача лорашта баркал аьлар цу тайпара хьинаре болх вай мехка беш хиларах. Иштта дIахо йодача хана а цхьана хьинаре къахьегаргхиларах догдоахаш а ва ше аьлар цо хьаьшашка.

Матенаькъан Илез

№125 (12061), ера, 23 август, 2018 шу /Четверг, 23 августа 2018 года

Добавить комментарий

Ваш e-mail не будет опубликован. Обязательные поля помечены *