Керда шу дала беркате долда вай!

Укх шера 11 сентябре дIадолалуш да бусалба наьха календара тIа керда 1440 шу. Уж шераш ларха доладаьд, Пайхамар (Даьла салот салам моаршал хилдв цунна) Маккара Мадинате дIавахача хана денз хьа. Элча (Даьлера салот салам моаршал халда цунна) шийна дукха езаш йола Макке йита ший тешаме новкъосташца Мадинате (Ясриб) дIавахав 622 шера (юлиански календарах). Цу ханналца чIоагIа воча хьале хиннаб хьалха им дилла нах, цIувнашта гIулакх дечара бала бар бахьан долаш.

ХIета Ясрибе (цул тIехьагIа тиллай цох Мадинат, аьнна, цIи), уж хьакхачарца дIайолалу Ислама керда зама. Цу шера тIадахкад деррига паразаш а. Цу шера даьда хьалхара маьждиг а. Iалам нах яхачогI. Календарь дIадоладаьд хьалхар халиф хиннача Iумар асхаба (Даьла раьза хийла цун).
Керда шера хьалхара бутт Мухьаррам, беза лаьрхача биънех цаI ба. Цунга хьажжа, укх бетта махулла терко тIаяхийта еза воча хьамагIа лоравалара, дика хьамаш хьадара, къаьстта марх кхабара. Хьана аьлча, Мухьаммад Пайхамаро аьннад: «Рамадан беттал тIехьагIа эггара дезагIа марха – Мухьаррам бетта кхабар да».
Цудохьа ер еза ха массаболча бусалба мехкашка лоархаш я. Укх хана дозалагI лаьца хьехамаш дир Назрана керттерча маьждиге а. Имам волча ЦIулой Хизаро беркате диийцар ер шу массаболча мехкахошта.
Х. Богатырев

№136 (12072), ера, 13 сентябрь, 2018 шу / Четверг, 13 сентября 2018 года

Добавить комментарий

Ваш e-mail не будет опубликован. Обязательные поля помечены *