ЦIена тIехье – сийрда кхоане

Дахача адамашта паргIато хургьяр деш, къахьегаш хилар чIоагIа эшаш гIулакх да тахан латтача хьалах. ХIана аьлча, дерригача дунен тIа цхьатарра паргIато яьржай Iилмаш кIоаргагIа тохкаш Iомадирца, поалхамца алсамбувлача наха хьегаш дола къа бахьан долаш. Цу тайпарча гIулакха дIатIехьакхе, дуненца хила чам болаш моттигаш вай мехка ГIалгIайчен доазон тIа а вIаштIехьа йоахаш я цхьаццанахьа.

Дика лахар, из кхедеш хьалдар, цунца никъ бар, из даха дисар догдоахаш къахьегар чIоагIа дика да. Кхы вIалла деце мехка, шахьара, пхье куц доаккхаш, наха салоIам хулаш вай моттигаш хозъеш хIама да из. Бакъда, хьадаьр лора а ца деш, из кегадеш, цох адама зулам деш хьувзар геттара во гIулакх да укх кегаенна латтача хана хIаьта а.
Вайна ховш ма хиллара тIехьарча хана Наьсарен шахьар хозагIча оагIорахьа тоалуш, шерлуш йоагIа. Бакъдар аьлча хила йиш йолчоа юхера ма хетта тоаеннаеце а ди тIехьа амат хоз луш, дегIайоагIаш я вай Нана-Наьсаре. Цунца наьха са а къердалу.
«Сердало» редакце юхе иттех метр мара гаьна йоацаш остановка я, нах дIа-хьа кхувлаш йола юкъара маршрута автобусаш сувцаш. Iуйранна балха хьабоагIача хана а, сайранна юха чуболхача хана а цига бахка а баха а нийслу тха болхлой. Со а нийслу цу остановке водаш-воагIаш. Кхы массаза машина лоаллаш мича лел со.
ХIетта мо, се балхара ма ваьлланге а автобусаца чуваха лаьрхIа, дIа а ваха остановке хьежаш болча наха Iоховша лаьрхIа техача гIанда тIа Iоха лаьрхIа Iолохлушше аз зийр букъ беттача дIаьхача гIанда тIаоттадаь сурт. Дукха тайпара эздий доаца йоазош да цу тIа даь. Ший вIалла а саг хетача сага яздулар тамаш йолаш да даь йоазош. ДIа-хьа яппараш еш а, безам, гоамал, майрал, эсалал, доастамал гучайоаккхаш а къамаьлаш да гIанда тIа яздаьраш. Цул совгIа, геттара сона халахийттар да язбаь бIеха мотт.
ТIехкарал лохах къамаьл деш, шийга хьааьлча товргдац, мегаргдац аьнна хета хIама нахага дувцаш волча сагах адам лаьрхIадац вай къамах болча наха. «Къамаьле тIехкарал лохе кхувдар маIи вац», яхад вай даьша. Даьла раьза хилва цунна, Белхарой БатIал-Хьажас аьннад, аьле боккхийча наха хьоаду, «Кертахи, гигахи, юхахи воха йиш яц къонах», аьнна. Цун маIан да – цу кхаь хIамах цхьаннех хьо веха вале къонах вац хьо яхилга. Цудухьа сона хала да вай къамах болча наха из мо хIама даьд аьлча теша.
Даггара бале а итт шерагара ткъаь шерага кхаччалца бола кагирхой хургба уж хIамаш яздаьраш. ХIана аьлча кхы зIамагIболчарна цу тайпара хIама язде ховргдац, хIаьта боккхагIчарна из харцахьа долга хов хургда. Сона хет иштта хургда аьнна, деце а хилам деза. ХIаьта цу аз белгалъяьча хана чу боагIача кагирхоша цу тайпара хIама дIа-хьа дувцаш, е гушбоацача нахага яздеш хилча цар хьаькъалаш гоалдаргда, царех хурделаш хургья. ХIаьта из мегаргдолаш дац. БоккхагIаш ба шоай дезалга хьажа безараш а царна дезар, эшар хьалхадаккха дезар а.
Хьамсара дай-ноаной, шоай бераш фу леладу, цар шоай мотт мишта бувц, уж мичахьа лел, цар фу юъ, фу мола хьажа. Геттара хоза остановка я из аз лакхе хьоаяьр, цу чу теха гIанд а да дика, бакъда вай бераш из моттиг дегазаяьккхай. Мегаргдац из, дIаала вай берашка.

Матенаькъан Илез

№148 (12088), шоатта, 6 октябрь, 2018 шу/Суббота, 6 октября 2018 года

Добавить комментарий

Ваш e-mail не будет опубликован. Обязательные поля помечены *