Сурхо тIа кердача шера керда школа хилийта гIерт

Карарча хана мехка дешара заведенеш хьаеллара болх дIабодаш ба. Хано дIаехача тайпара керда школа хьаеж латт Сурхо тIа а. Из я кхозза вIаштара яь гIишло. Кхолха хиларга хьажжа, лифташ а да укхаза Iалаш деш. ДIадахача аьхкий укхаза яьгIа къаьнара школа дIаяьккхачул тIехьагIа дIаболабаь из болх дикка гаьна баьннаб. Ер школа лаьрхIа я, боккхагIчар классашта санна зIамагIча дешархой берашта а. Цхьан сменах 500 бера Iилам дала таро хургья укхаза. Из Iалаш е гIерташ объекте къахьегаш ва 100 гаргга болхло. Хьальеж латтача дешара заведене дIалоацаш дар 4 гектар лаьтта да.

Даькъ тIара прораб волча Манкенаькъан Ахьмада яхачох, укхаза болх сеца вIалла ха хилац, чура а ара а цхьана дIадолхаш да балхаш.
— Тахан монолитни балхаш довлаш латт. КхоалагIа гIата тIара тховна лаьрхIа йола плиташ хьаеш да тхо. Арара пенаш хьалдетта доалаш латт. Чура свет а, отделка а дIайолаяьй, — аьнна белгалдир прораба
Иштта бераштеи, кагирхоштеи Iалашъяь низъоамала майдаш а хургья укхаза, Дала мукъалехьа. Спорта лаьрха къаьста зал а хургья.
— Низъоамала майдаш а хургья укхаза, — йоах Манкенаькъан Ахьмада. – Баскетболах, волейболах, мини-футболах ловза моттиг хургья, иштта гимнастически майда а хургья.
Дерригаш балхаш чакхдаьха, школа хьалъяь яккха лерхIаш ба болхлой 2018 шу чакхдаллехьа.
Бохтаранаькъан ХIарон

№150-151 (12086-087), ера, 11 октябрь, 2018 шу / Четверг, 11 октября 2018 года

Добавить комментарий

Ваш e-mail не будет опубликован. Обязательные поля помечены *