Медицина говзал

МоллагIа керда юкъе дена хIама, юхьанца боча а, цунга хьежжа лорадеш, нах дукха хьакхашта ца бовлаш а хул. Цу тайпара хIама да Медицина оагIорахьа гучаювлаш йола хиланза яргйоаца говзалаш а. Мидицина Iилман даькъе а, цунца болх беш болча нахах а хьалха дIаихача шерашка а, карарча хана а дийцад оаха, дале а кхы дIахо цу даькъе гIулакх дувца, кердадаккха а нах цу хIаманна дух тIа баха а лов сона. Из да Анестезия яхача медицина даькъах дола дош, вешта аьлча, дIатхьовсаварца саг кхетамчура ваккхар да из. Тахан латтача заман из доацаш саг эттIавеча лорашта болх хьабе хала да. Сага дегIацара моллагIа маьже йоаттIаеш хилча, анестезия ма енге а, цу сахьате дIа а тхьайсе, цхьаккха лазар хо ца луш, гIулакх чакхдаллалца таккхалча улаш хул унахо. Ший тайпара говзал я из Дала лорашта енна.

Медицине долаш да Анестезия яха хIама. Ше Дала кхеллачахой цкъа церг тоае ваха е урса кIал Iовижача сага дика хов из фуд. Из, хьалха санна а доацаш, тIехьарча хана массаза лелаеш я медицине: саг эттIавеча а, дIахо кхыдолча хирурги балхашкахьа а. ХIанз церги пхьар волча вахача наркоз йоацаш болх биц. Анестезия яха хIама ше доакъошкахьа екъалуш я: ший дерригача дегIаца саг дIатхьовсавеши, е доххьал йоаттIа а яь дарба де дезаш йола моттиг мара тхьовса ца еши. Из а вож а – шаккха е езаш ма хилда вай. Бакъда, из е езача дIатIаваьнна саг, лорашта дохьале ца а еш, цар яхача тайпара ший гIулакх чакхдоаккхаш хилар гIойле я.
Шераш дIаахарца, медицинаца наьха вахар лорадара тIехьа дола наькъаш корадаь, дукха ха дIаяхай. Хьалха юххьанца гучаяьннача тайпара а йоацаш, зама хувцаеларца, ха дIа мел йода, медицина геттара алсамйоалаш, яржаш, чIоагIлуш йоагIа дерригача дунен тIа. Хьалха вIалла а дага ца хиннача тайпара говзалаш а йолаш, дукха хIамаш ду лораша хIанз тIехьарча хана. Хийла, цундар чакхдаьннад аьнна вайна хеташ вола саг цу сахьате дарба дий меттавоалаву цар, Даьла къахетамца.
Эггара хьалха анестезия гучаяьннай 1846-ча шера. Наркоз еларца операци яьр дунен тIа цIихеза цергий лор хинна Томас Мортон ва. Цо из яьй октябрь бетта 16-ча дийнахьа. Цудухьа цу хана денз из ди, белгалдаь, дездеш да, «Анестезиолога ди», аьнна цIи а йоаккхаш. Ше хьалхара сага енна наркозацара гIулакх иштта гаьнадаргда аьнна, Томас Мортона хийттадеце а, цу шерашкахьа из цо керда юкъедоаладаь хинна хIама бахьан долаш, эзарней вахар кIалхардаьккхад лораша.
ХIара дийнахьа хIана дац ала, анестезиологаша дакъа лоац саг эттIавеш лораша болх мел беча моттигашка. Цар яьча наркозага хьежжа хул кIалха уллача унахочун хьал. Шоай болх лерттIа ха а ховш, цох кхеташ болча анестезиологаш дунен нийсса ба, цар мах лакха а ба. ХIана аьлча, аз ма аллара, уж дакъа боацаш хирурги цхьаккха а болх дIабодац тахан. Иштта эттад из дерригача дунен тIа.
Хьалха, юххьанца вай республика хьахиннача хана санна а доацаш, вай мехка а медицина даькъе йола говзал дикка алсамъяьннай. ДукхагIча оагIорахьа эшашбола лораш а болаш ба, къаьстта анестезиологаш ба вай дика кхеташи, балха говзал лакха йолаши. МоллагIча тайпара бале а, лорий болх хала ба. Кхы мел дар дIадаьлча, унахошта юхебагIа беза цар. ХIаьта унахой башха ба, оамал атта йолаш а хала йолаш а. Из кхетадеш, цунга хьежжа кийча хила беза лораш а. ДукхагIа анестезия еш лораш дIахьош бола болх нийслу реанимаце е лаьрххIа цу гIулакха къоастаяьча операционне. ХIаьта хийлавар реанимаце чугIерташ хул, лораша эттIавеш латтача шоай унахочоа дIатIакхача гIерташ. МоллагIа дагдехача хана саг чувуташ моттиг яц из. ДIачуводе а, ший унахочоа а лорашта а новкъарло яр мара, цига саго де хIама дац.
Укх шера анестезиологен 172 шу дизад. Из йоккха ха я, бакъда, денгара ди массаза дала, цу даькъе кхы а говзал хьасовйоалаш латт. Укх шера а хьалха санна октябрь бетта 16 дийнахьа дездеш хиннад анестизеолога ди. Цу денца вай мехкара анестизеологаш даькъала бувцаш царна баркал оалаш хилар мехка бахархой.

Матенаькъан Илез

№154-155 (12090-091), ера, 18 октябрь, 2018 шу / Четверг, 18 октября 2018 года

Добавить комментарий

Ваш e-mail не будет опубликован. Обязательные поля помечены *