«Электроцинк» яхача заводе хинна хатар Iаткъаргдий-те вай могашала?

Цу хаттара хетаяь кхетаче дIайихьар ГIалгIайчен Правительства тхьамада волча Евлой Заьлмаха бехктокхаме йола урхален кулгалхошца. Ховш ма хиллара, октябрь бетта 21 дийнахьа цIи яьнна хатар хинна моттиг эттаяр Буро тIа йолча «Электроцинк» яхача заводе. Цига яьннача цIеро дIалаьца доазув хьалха баьча хоамах 500 квадратни метр мара яцар, цул тIехьа из дIаяьржар 4,5 эзар кватратни метрага.

Бийсан хатар хилча Iурра дIадихьача вIашагIкхетаре дIакъалоацаш бар Хатарах йолча министерства кулгалхо Колой Руслан, экологии Iаламанни министр Бапхой Мухьмад, ГIалгIай мехка гIолла йолча Роспотребнадзора хьаким Къамурзой Дауд, иштта вай мехка гIолла йолча Росприродназора урхален хьалха латта Бекбузаранаькъан ХIарон.
Кхетаче дийцар вай мехкара экологи хьал. Доакъашхош белгал даьчогI из лертIача хьале я. ХIирий мехка хатарагх йолча министерства пресс-службо беча хоамах, фецара зене йола хIамаш хала йиш йолча боарамал лакхагIа ейна яц. Вай мехка гIолла йолча хатара министерства кулгалхочо белгалдир, карархача хана ХIирий мехкарча новкъосташца бувзам лоаттабеш да тхо, аьнна. Нагахьа фецара зе деш йола хIамаш боарамал лакхйоалаш хуле, лаьрххIа йолча, приборашца цIи яьнначара мух вай юрташкахьа хьабоагIий хьожаш хургда тхо, аьлар Колой Руслана. Цул совгIа федераци керттерча бехктокхаме йолча Урхаленашца бувзам лоаттабеш я шин мехка Iаламан министерстваи Роспотребнадзораи кулгалхой.
Из болх мел ца болийташ дIахо а хIанз санна дIабахьа беза аьлар, Евлой Заьлмаха долча хьалах правительстве хоам а беш.

Бохтарнаькъан ХIарон

№158 (12094), шинара, 23 октябрь, 2018 шу/Вторник, 23 октября 2018 года

Добавить комментарий

Ваш e-mail не будет опубликован. Обязательные поля помечены *