Лоам керда рузбана маьждиг хьадийллад

Укх деношка лоам ОльгатIе доккха цIай хилар цу юрта бахархошта хиларал совгIа берригача мехка а. Керда хьалдаь Маьждиг хьаделлаш дукха адам вIашагIкхийттадар цига, берригача мехкара хьаьший тIабийха. Юрт ше сов йоккха еце а тIехьагIа нах хьабийбача эшам хургбоацаш 500 сага лаьрхIа моттиг йолаш да керда хьалдаь Даьла цIа. Цох бола хоам язбаьбар Мехкдас Инстаграма ший оагIон тIа.

Бусалба наха кхаа хиннача вIашагIкхетаре дакъалоацаш бар: вай мехкара лерхIам бола боккхий нах, бусалба Iилма дийша лоархIаме, боккхий Iалам нах: Бидери Iабдулла, Пошев Шахангири, Акилов Саид-Хусейн, иштта укхаза бар ГIалгIайчен Мехкда Евкуранаькъан Баматгире Юнус-Бек, юрташкара имамаш, лоархIаме хьаьший, ОльгатIара а, цун лоалахарча юрташкара а бахархой.
Белгалде деза маьждиг хьалде 2 шу хьалха доладаь хинна хилар. Лард елла доладичахой ца хаддаш болх беш таханарча денга кхаччалца къахьийгад цига наха. Маьждига керттера балхаш чакхдаьнначул тIехьагIа цу чура хозал Iалашъеш, бусалба йоазош деш къахьийгад ГIалгIайчера а ДаьгIастанерча а суртанчаша тIехьарча 7 бетта.
Маьждиг геттара хоза товш да къаьгача лоаман юрта. Диъ мимар а долаш, юкъера тхов йоккхача куполца белгалбаь да Даьла цIа. Ховш ма хиллара хоза тIехйолча технологешца хьалдаьча Даьла цIен дохьала гуш я Аьрзи яха лоаман къаьнара юрт. Укхаза саготал ха дIаяхьа а шоашта салаIа вай мехкарчарел дукхагIа арахьара а нах тIаух. Аладеза, дIахойодача хана мехка баьхкача туристашта хьажа кхы а лоам моттиг тIакхийтта хилар.
Маьждиг дарах баркал а аьнна, Даьла цIа догIар мел лерхIам болаш да а, цунгахьа хургдолча диках а дийцар ОльгатIарча имамо Евкуранаькъан Башира. «Лаьттан букъ тIа эггара езагIа йола фусам хьаеллаш вIашагIкхийтта да вай – Даьла цIа. Даьлера салам моаршал хилда цунна, Даьла Элчас йоах: «Даьла цIа дегIача сага Дала ялсмала цIа догIаргда». Дала укхаза къа мел хиьйгача наха маьл язболба, ший дикагIча совгIатех совгIат лулда, беркатагахьа совбоахалба. Доккха совгIат да ер къаьстта укх юртарча наха».
ВIашагIкхийттача цхьана параз ламаз а даь, хоза сагIах а кхийтта Даьла хеставеш тасбихьаш а яьха, Пайхамар хеставеш мовлат а дийша дIа-хьа къаьстар нах.

Матенаькъан Илез

№158 (12094), шинара, 23 октябрь, 2018 шу/Вторник, 23 октября 2018 года

Добавить комментарий

Ваш e-mail не будет опубликован. Обязательные поля помечены *