Бераш – дега-гIозле

«Бер доаца цIа – сина халбат» яхад вай даьша. Да а да из ишта. Тийшаболх, харцо, вол, гоамал, аьлдит, цабезам иштта кхы а цу тайпара дола хIамаш фуд ца ховш, нахаца хьаьнала, маьрша, машаре да бераш. Ханаца боккхагIчаргара Iомадича мара кхетам хилац цар наха юкъе цатоамаш доахача хIамаех. Къамаьл хIанз кхыча апарах хувцаргда вай дIахо.

Миччахьа се нийсвелча, нагахьа санна цига сакъердаме а, пайдане а хIама дале сурташ даьхе, е вийдео яьккхе хIама ду аз. 2013 шера, пхи шу хьалха да-кх из, бIаьсти, Экажкъонгий-юрта наькъаца ягIача геттара хоза зиза техача хьеха сурташ доахаш, зизашкара модз гулдеш хьувзача нокхарашта, зIиймозашта, дадалгашта сурташ доахаш вар со. Иштта со воаллаш, юаш маькх а йолаш, бе доахкаш чипсаш яха коартола лаччараш чудола кулекаш а долаш, даьхка хьаайттар 3-4 шу даьнна хургдолаш бераш – вошеи йишеи. Цхьацца шишша дувцаш къамаьл дIаьхделча, шоаш хьана да а, мичахьа даха а дийцар сона бераша. МоллагIча сага хьаста догдоагIаргдолаш хоза бераш дар уж. Царна сайна ховш дола хьехар а даь, водаш царца сурташ а даьха дIахо вахар со.
Сона-м из гIулакх дицденнадар. Бакъда сийсара компьютера чу цхьацца дола сурташ цхьалхадоахаш волаш бIаргадайра сона цу хана айса сурташ даьха бераш. Дега цхьа хьамсара а, йIовхал луш а, халонаш балаш дицдеш а ха ера сога. Цу хана аз хаьттача шинне а шоай цIераш-м яьхаяр сога, амма сона хIанз дагаягIац цар цIераш. Укх сурташ тIара бераш да уж. Хьаькъале, беркате, унахцIена, шаьра гIалгIай мотт бувцаш дар уж шаккха а.
Хетаргахьа уж бераш хIанз кхийна а, деша ухаш а хургда. БIаргадайча сона ца довза а тарлу уж. Вешта со дагава а ца ва а мег царна а, бакъда пхи шу хьалха хинна шоай сибаташ бIаргадайча тоам хургба царна. Цудухьа хьатIадахардухьа сурташта кепа тохача дIачуденнад аз уж. ДегIа дале кхоана е ломма царна уж сурташ дIалургда.
Бераш вай кхоане я, ираз долаш беркате дахар да. Лакхе волалуча хана аз аьннача тайпара маьрша, дог-цIена, хьаийна бераш дар уж. Иштта да дукхагIа мел дола бераш. ДIахо йодача хана цар вахаре иразе кхоане Iалаш е, уж укх харцача дунен тIа маьрша бахийта декхарийла да вай. Жи, хьасталаш шоай а наьха а бераш. Оалаш ма хиллара малайкаш да уж.

МАТЕНАЬКЪАН Илез

№160 (12096), шоатта, 27 октябрь, 2018 шу/Суббота, 27 октября 2018 года

Добавить комментарий

Ваш e-mail не будет опубликован. Обязательные поля помечены *