Сулайма-пайхамар

«Хьайбаех дола гIалгIай фаьлгаш» Оттадаьраш Д. Мальсагов, Б. Зязиков. Нохч-ГIалгIай книжни издательство, Грозный — 1961 шу.

Сулейма-пайхамар са мел доаллача хIаман мотт ховш хиннав яхаш дувц.
Боккхача бIуна хьалха а волаш, цкъа тIем тIа водаш хиннав Сулейма.
Новкъа болхаш шоаш санна наькъа даьнна долхаш зунгатий нийсденнад царна – цар а ду йоах дIаьха наькъаш.
ЗIамига зунгатий зе а ца зувш, бIуво говрий баргаш тIадетташ доадаьд уж.
ЭгIаздахача цхьан зунгато цIогIа техад:
— Фу Iовдал вола ер ше мичахьа гIолла вода а ца ховш, наькъа водар! – аьнна.
Из хазаьча Сулейма-пайхамара зунгат хьа а лаьце, ше волча хьада аьннад. Ше волча хьаденача зунгата цецваьнна бIара а хьажаь, аьннад цо:
— Селла зIамига долаш а ма цIимхара да ер!
— 3Iамига а, денал долаш а хилар гIойле я цхьаккха хIаманна пайданна йоаца дажал хулчул, — аьнна жоп деннад зунгато.
— Из корта ма боккха ба хьа!
— Болче, хьаькъал чулаца моттиг я-кх.
— ТIаккха из юкъ хIанай хьа селла йиткъа?
— Эздийча сага юкъ йиткъига хул. Со гийг хьалхайоахаш дахац. Аз айса дуаш дола хIама ца дала мара даац.
— Мел кхача буъ Iа шера?
— Сона шера цхьа кIина фийг тоъ.
— Цхьан фийгах кхоачам бу Iа! Тамаш я-кх бойя! Хьадола, хIаьта, хьожаргда вай, Iа яххача бесса шера цхьа фийг хьона тоий, — аьннад Сулейма, хIаьта ший эздешта тIадиллад цо кIопилга чу цхьа фийг а тассе, цу чу зунгат дIахеца, аьнна.
Шу даьннад. Сулеймана зунгат геттара дицденна хиннад. ХIаьта, цкъа Iохайна вагIаш кIопилга чу доалла зунгат дага а деха, хьажаьв из. ЧIоагIа цецваьннав Сулейма: шера ах фийг мара биаь хиннабац зунгато, хIаьта вож ах кхобеш хиннаб.
— Ах фийг мара хIана биаьбац Iа? — аьнна хаьттад Сулейма.
— Ах фийг мара биаьбац, — аьнна жоп деннад зунгата, — хIана аьлча со укх баьдеча чуделлача Iовдала кхы цхьаькха шера а со дицдала мегар, цудухьа фу хул, мал хул а мича хов аьнна, ах фийг юхебитабар аз.

№162-163 (12098-099), ера, 1 ноябрь, 2018 шу/Четверг, 1 ноября 2018 года

Добавить комментарий

Ваш e-mail не будет опубликован. Обязательные поля помечены *