Паччахьа йоакхо ю гIулакх

Наха цох фу хет хац сона, бакъда сона боккха кхаъ хиннаб, укх деношка Россе паччахьа В. В. Путина вай мехка дахача къамий метташ лорадеча а дегIакхувлача а гIо дергдола Фонд хьаярах дола указ арадаккхарах. Цу тайпара хIама меттай хьаькъехьа гуча ца доала, Iаьдала болхлоша ца оала дукха ха яр. Дуккхабараш къамий метташ дIадаха гIерташ болча хана, царех луш йола экзаменаш 9-ча классашкара а дIаяьхача хана, чIоагIа эшаш а ший ханнахьа а аьнна дош да вай мехкарча паччахьа аьннар. Вайна дагадоагIа, дукха ха йоацаш Госдумас къамий метташта духьала дIайолаяь кампани мел вас еш яр тайп-тайпарча къамех болча викалашта, цу даькъе гIалгIашта юкъера хьабаьннача наха а. Оалаш ма хиллара «мотт беце, къам а дац».

МоллагIча къаман керттера белгало, юхь я бувцаш бола мотт, цу къаман йоазув. Хала хете а, укх тIехьарча хана воча хьал тIа эттадар къамий меттай гIулакх. Из бувцараш шерагара шерага кIезиглуш латтар, гIалаташ а доацаш йоазув де ховш, наггахьа мара саг нийслуцар. Наьна мотт лорабе беза, дегIакхувла беза яхача наха бIагIара хьежар, уж бокъонца бола националисташ болаш санна. Вай мехка хозал, цун лаьтта дукха а дика а къамаш дахаш хилар я. Цар метташ тайп-тайпара декаш хилар а дега салоIам беш да. БIаьстанарча хьун юкъе дIачуваьлча, деррига оалхазараш шо-шоай меттала дек, массар а цхьа йиш ца лекхаш, цхьа мотт а ца бувцаш. Фу хургда цул хозагIа!?
Метта, моллагIча къаман из бале а, сий де деза, из бувцаш бола нах лархIар да из. Метта тIагIолла а чIоагIдала е доха тарлу наха юкъера хоза гIулакх, доттагIал. Са мотт безача сага, со а везаргва. Са мотт ца безачоа, из гоама болчоа, со а хургва гоама. Къамашта юкъера хоза гIулакх чIоагIдергда аьнна хет сона, В. В. Путина кулг яздаьча цу указо. Дуккхача къамашта дикахетар даьд цо, тIаккха цу тIагIолла хьахулаш да-кх барт, цхьоагIо яха хIамаш. Къаьстта сайгара баркал ала лов сона вай мехка паччахьа, из гIулакх дагадохарах а чакхдаккхарах а. Цо хьабийлла из никъ нийса, гIалат доацаш дIабахьа беза шоай наьна мотт тоабалар ловш болча наха. Тахан дуккха хIама кIалдиса латт гIалгIай метта а. Книжкаш йоазонхоша Iояздой а, уж арадаха низ кхачац цар шоай а паччахьалкхен а. Школашка из лакхарча боарам тIа Iомабара эша методически гIо дергдола йоазош дац, дараш а къаденнад дукхагIдараш. Цу меттаца дувзаденна арадоахача дошлоргий автораш из кIоаргга бовзаш боаца нах хул, цудухьа уж гIалатех хьалдикъе хул, боаггIаш бола тIахьожам лоаттабеш саг цахиларах, бараш шоаш а дукха хIама ховш цахиларах. Ханнахьа арадувлац школе Iомаду книжкаш, из а издательствон бехках хилац. Е ахча доацаш дус, е бахьанаш доахаш гоаду. Цу меттаца болх беча наьха алапеш кIезига хул, газеташ тIа яздеча авторашта лу гонорар геттара лоха я. Телевидене вIалла кепиг а луц царна, кхыметтел «СелаIад» яхача берий журнала а вIаштIехьадалац берий ахча ханнахьа дIадала. Цкъаза бIарчча шера гоаду из. Газеташ тIа кепа етта материалаш дукха гIалаташ долаш хул, цар автораш мотт дика ховш цахиларах. Болх бе, язде безам хилар пайдана мичад, из хьабе, язде хьона лерттIа ховш ца хилча. Кхыметтел меттах йолча Олимпидашка котдаьннача берашта лерттIа грамота, совгIат луц. Из деррига Iаткъаш да наьна мотт Iомабара.
Нагахьа санна паччахьа хьоахаяь Фонд хьайойя, из воча наьха караяхийта мегаргьяц. Во нах яхилга мишта кхетаде деза? Уж ба кулга цIена боаца нах, из мотт ца ховшше а, цунна доал де гIертараш, озабезамаш дергдараш. Вешта аьлча, нийсхо йоаца нах ба озабезамаш дераш, шийна везар хьаллоацаш, шийна цавезар Iо а теIавеш, из мел хьаькъал долаш вале а. Из Фонд цхьаккха тайпа дIаяла мегаргьяц йолаш йолча паччахьакхен органашка, ший къаьстта хила деза цун вахар, болх. ТIаккха мара лерттIа дIагIоргдац цун гIулакх. Аьттув балар лов цу новкъа.

С. Арчаков, йоазонхо, хьехархо.

 

№165 (12101), ера, 8 ноябрь, 2018 шу/Четверг, 8 ноября 2018 года

Добавить комментарий

Ваш e-mail не будет опубликован. Обязательные поля помечены *