Ресайклинг вай мехка кхачарах

Ресайклинг яха дош хеза а, хезанза а цун маIан ца ховш а дукха нах хила тарлу. Фу яхилга да «Ресайклинг»? МоллагIа хIама лелаергахь шоалагIча наькъа тIа яккхар: цкъа лелаяь, совъяьнна хIама-барзкъа, аьшк а, Iоакъинг а, пластмасса а — кердача гIулакха дIаяхийтар. Масала: совъяьннача пластмассах, къаьстача машинаца чакх а яьккха, бе леладу, каьхаташ чудехка планшеташ хьаяр. Цу тайпара гIулакх дIа-хьа даьржа даьннадац, хIаьта вай кагирхошта юкъе Калиматнаькъан Адам ва, из болх дика ховш а, цу наькъ тIехьа къахьегаш а.

Эггара хьалха «Ресайклинга школа» Адама къахьегар бахьан долаш, Iалама цIенал лораярах йола кертера белгало а хинна дIачIоагIъелар 2017 шера. Одессе а ваха, из говзал тохкаш, цун наькъаш Iомадеш, лерттIа из гIулакх карадерзадеш ха яьккхар цо, тIаккха цIавеначул тIехьагIа цхьацца керда болх кхоачашбе хьажар.
— Дукхаза уйла йир оаха: нувхаш, совъяьнна хIамаш цхьан меттера дIаяьхачул тIехьагIа кхыча метте дIа ма хьой, наьха бIарга кIал ца хилчахьа, хIаьта уж вIалла хургйоацаш фу дергдар, — дийцар Адама ше волаваларах. — Цига интернета доазув тохкаш, тхона коравир Голландера инженер, цу ресайклинга наькъ тIехьа къахьегаш вола, тайп-тайпара техника хьакхолларца. Оаха лаьрхIар моллагIа каьхат а, пластика а чакхйоахаш йола яшкаш вай мехка балха моттигашка Iоовттае. ТIаккха из уйла-нигат кхоачашдеш, укх 2018 шера оаха тхоай ресайклинга болх хьокха бихьар хIара шера Пятигорске дIахьош йолча «Машук» яхача форуме. Цига эггара дукхагIа бола 240 балл баьккхар оаха!»
ХIаьта тахан Адам ший болх юкъах буташ вац: тахан ресайклинга доазув шерденнад цу зIамигача сага къахьегам а, цун балхацара безам а совбаларца. Укх шера «Машук» яхача форуме Адама болх къаьста белгалбаьккхар Россе паччахьа Путин Владимира. Iалам лорадара хетаяь йола урокаш юкъейоалаяр бакъахьа хилар хьоадир Адама ший къамаьлагахьа, Iаламцара цIенал кертера хилар хьалхадоаккхаш. Цу тайпара дешара сахьаташ юкъедоаладергхилар чIоагIдир Россе паччахьас!
Тахан Калиматнаькъан Адам хьокхам а хинна дIаэттав кагирхошта. ДIахойодача хана ше цаI хинна а ца Iеш цу тIехьа къахьегаш кхы а говзанчаш хургболаш кагирхошца къахьегаш ва Адам. ХIаьта Владимир Путина бе боалла каьхаташ леладу папка Адама цу наькъаца хьабаь ба. Иштта къаман накъабоала къахьегамхой ма эшалба вай мехка!

Новрузнаькъан Макка

№165 (12101), ера, 8 ноябрь, 2018 шу/Четверг, 8 ноября 2018 года

Добавить комментарий

Ваш e-mail не будет опубликован. Обязательные поля помечены *