Шоаршк

«Хьайбаех дола гIалгIай фаьлгаш» Оттадаьраш Д. Мальсагов, Б. Зязиков. Нохч-ГIалгIай книжни издательство, Грозный — 1961 шу….

Цогали, борзи, зIийи хиннад шаьрача ара гIолла дIадолхаш. Наькъа тIа уллаш, Iуно ший бала боаллача устагIанна чура хьаяьккха Iокхесса улла шоаршк кораяьй царна. Из шоашта корайича кхел яьй цар: ер шоаршк вайна массанена а яъал яц, ер цхьаннена ма-ра тоъаргьяц. Уккхаза набъе Iо а дийша, гIa дикагIа дайначо юъаргья вай ер, аьнна.
Борзи, цогали тхьовссалца йоллача йижа а илла, уж тхьайса ма тхьайсса а, шорттига такхаь тIаяхача зIийво уж шиъ сомадалалехьа шоаршк йиай. Цул тIехьагIа тхьовра ше иллача такхаь юха а яха, Iойижай зIий.
Тхьайсачара сомадаьннад борзи, цогали. Берзо хаьттад цогалга;
– XIa, xIa, хIанз во-воашта бIаргадайна гIанаш дувцаргда вай. – Хьона фу гIa дайра, цогал?
Цогало аьннад:
– Со бус такхаь цхьа наьха котамаш йоахкача бун чу а даьнна, цу чура котамаш дуккха йоа а яь, цхьаяраш юаш, вожаш тIехьагIа яа лаьттах ехкаш. тIаьнкI, аьнна, котамий дулхах со дизаь доаллашехь, цхьа модз доалла никх корабир сона. Цу дулха тIа из модз а дуаш, гIаддаха со доаллача гIолла сомадаьлар-кх со.
– ХIаьта, хьона фу гIa дайра, борз. Хьайна бIаргадайна гIa Iа а дувца вайна, – аьннад цогало берзага.
Берзо аьннад:
– Со цхьа Iу тIехьа воацаш тинна лелача дукхача жена арахьа тIа а нийсъенна, уж жа Iолелхадеш, хьаллелхадеш доадеш, дийначун думи боаккхаш, бенначун цIий мелаш, иштта цар цIий а мелаш, думеш а дуаш йоаллача гIолла сомаяьлар со.
ТIаккха зIийга хаьттад цар:
– Хьона фу гIa бIаргадайра? – аьнна.
– Даьра, сона-м гIa а довнзар. Шоана дайнача гIанех тоъам хинна, шо хIаьта а вета а дулх диаьи цIий мийннеи дизаь а ма дий, цар шоашта хилча а кхы хIама а дуарг мичад, аьнна, се мецъеннадаь из шоаршк а йиаь, юха Iойижар со-м, хIаьта сайна хиннадаларе оаш санна дуккха цIий а мергдар, дулх а дуаргдар, мезах а чам боаккхаргбар, – аьннад зIийво берзагеи, цогалгеи.
ТIаккха, шоаш, дийшаь даддашехь, зIийво из шоаршк йиаьлга а хайна, цунах лата, аьнна тIахьийлхад борзи, цогали. Уж шийна тIа ма хьийлха а ший массада а кIарцхал хьадоаржа а даь, хьаьрчча йижаьй зIий. Борзи, цогали кхы цунна хIама де а ца могаш, даьнна дIадахад.

№165 (12101), ера, 8 ноябрь, 2018 шу/Четверг, 8 ноября 2018 года

Добавить комментарий

Ваш e-mail не будет опубликован. Обязательные поля помечены *