Скорая помощь юкъе йолаш хатар хиннад

Укх деношка «Лада-Грантаи» скорая помощи вIашкакхийтта хатар хинна моттиг хиннай Шолжа шахьаре. РИА-новости агенствос беча хоамах, цига лозаваь больнице кхоачаваьвар 5 саг. Царех 2 халача хьале вар. Лозабаьчарна юкъе ба: шинна машина водителаши, лорий тоабацара ши саги, вокх машена чу яьгIа цхьа кхалсаги. Ноябрь бетта 12 дийнахьа царех шиъ чувахийтав, больнице виссача кхаьннех шиъ реанимаци ва. Даьла къахетамца лорий машена чу унахо нийсвеннавац.

МВД пресс-службе тхона хайначох, хатар хиннад «Лада-Гранта» духьаларча машинашта лаьрхIа болча наькъа оаса тIа яьларах. Ховш ма хиллара, машенаш вIашка а кхийтта вай наькъаш тIа хьа мел хулаш дола хатараш дукхагIдараш иштта хулаш да.
Карарча хана Iаьдала болхлой тохкаш ба хатара доакъашхоех малагIчун мел бехк ба. Цул совгIа, цу моча метте йоаккхача тайпара, водителаш беха хинна бий хьожаш экспертиз я йоаккхаш. Баьча соцамах, «Жигули» хехкаш ваьгIар, шу хьалха бехкатокхаме эза хиннав, менна а волаш авари яр бахьан долаш.
Хиннача хатара бехк хIанза а техка баьннабац, бакъда, ха дезар цаI да, лорий машенашта моллагIа наькъ тIа мара уж ца хиларах, нагахьа лаьрхIа йола сигнал йоагаш уж хуле, царна ма хулла сихагIа никъ бита беза. Уж лакхача скоростах бахка йиш йолаш ба, саг ца валийта гIо де шоаш сихха кхача безаш хиларга хьажжа. Цхьайолча хана цар хьош волча унахочоа, цхьа минот меттел, массехк секунда а тIехьа дукха йолаш хул. Воашта ма хой вайна мел сиха вай унахо волча лораш кхачар дезаш хул. Cиха кхача деза гIо дац из?
Европа мехкашка, къаьстта Германе, вай паччахьа бутача тайпара никъ бут унахочун оарцагIа йоагIача лорий машена. Вешта цхьачара-м паччахьа кортеджа а луц никъ шоашта машен тIакхетарг йолга хайначул тIехьагIа мара.
Цу хIаман бахьан курал я аьнна хет сона. Цудухьа вай курал юха а яьккха, паччахь воалавеш йоагIа машенашта санна, сихха вай никъ мукъбаккха безаш ши машен я: пожарни яри скорая помоща яри.

Бохтарнаькъан ХIарон

№169 (12105), ера, 15 ноябрь, 2018 шу / Четверг, 15 ноября 2018 года

Добавить комментарий

Ваш e-mail не будет опубликован. Обязательные поля помечены *