Iилманхочун цIерагIа урам

Укх деношка, газеташа а керда хоамаш деча кхыча гIирсаша а белгала ма даккхара, Iилманхо а, хьехархо а, йоазонхо а хиннача Мальсагов Дошлакъий 120 шу дизара хетаяь Iилман конференци хиннай. Сона ховчох (Мальсагов Абос яздаьд из), Дошлакъа декабрь бетта 23 дийнахьа ваьв, цхьайолча моттигашка из 1899 шера ваьв аьнна а хьоахадаьд. Цун тIехье дийна ма йий хIанз а, цудухьа цунна дикагIа ховргда из.

Мальсагов Дошлакъа наьна мотт дика ховш, дуккхача наха из Iомабе а шаьрбе а гIо деш хиннав, къаьстта а Нохч-ГIалгIай пединституте хьехаш волча хана. Массаза из хьехавеш, хеставеш хулар профессораш Оздоева Фирюза, Дахкильгов ИбрахIим, цох шоашта боккха пайда баларах дувцар журналиста Шадиев Султана, наьна метта хьехархочо Медов Йоакъапа, кхычар. ХIаьта цун вахар тохкаш хиннача Мальсагов Абос яздаьд: «…Ше цIихеза Iилманхо а, йоазонхо а, критик а хиларга хьежжа, Мальсагов Дахий Дошлакъас дилла а терко йора гIалгIай советски литература хьахилараи, дIахойодача хана из сиха дIегIаахараи. «ГIалгIай советски литература исторе очеркашта» лаьрхIа Зязиков Бахьаудинаца цхьана вай керт-кертерча йоазонхоех цхьа иттех гаргга критико-литературоведчески очеркаш язйир цо 1961 шера. Цига кIоарга анализ йир цо гIалгIай йоазонхойи поэтийи ОзиевгIар Салманеи Ахьмадеи, Яндиев Жамалдийи, Осмиев Хьамзатеи, Хамхоев Ахьмадеи, Хашагульгов Махьмадеи, иштта кхыбарий произведенешта».
Дошлакъас даьча йоазошта юкъе я, карарча хана школе Iомаеш йола «Iармхи» яха поэма, «Кердача наькъа тIа» яха пьеса. ТIеххьарчо 1931 шера Ростове хиннача Къилбаседа Кавказе дахача къамий искусствай Олимпиада йолаш, цига хьалхара моттиги карара кара тела ЦIе байракхи яьккхай. Из пьеса цо язъяь хиннай Мальсагов Оарцхоца цхьана. Нагахьа санна поэмах лаьца оале, цо дика довзийт лоамашка баьхача вай даьй хинна вахар, къаман селхане мишта хиннай, мел хала хиннад цунна тIалаттача дуккхача кхерамашта юкъе дийна диса. Аз доаккхал деш, цхьа хIама да са Дошлакъаца дувзаденна, Со вах Магасерча цун цIерагIа болча урам тIа.
Iилманхо дукха нах бовзаш, наха сий деш саг хиннав. Цунна тешал деш да шоана гуш дола сурт. Юкъе вагIар Мальсагов Дошлакъа ва. Аьрдехьа вагIар ва Нохч-ГIалгIай радио, цул тIехьагIа «Сердало» газета керттера редактор хинна Тебоев Тухан, аьттехьа – йоазонхо Осмиев Хьамзат.

С. Арчаков

№169 (12105), ера, 15 ноябрь, 2018 шу / Четверг, 15 ноября 2018 года

Добавить комментарий

Ваш e-mail не будет опубликован. Обязательные поля помечены *