Сагагахьа хила эша гIулакх

Эхь – наьха дегIаца долча гIулакхех дикагIчарех цаI да. Вешта аьлча эзди оамал я из.

Укх деношка нах дIа-хьа кхувлаш йолча юкъарча мехка автобусаца балха хьавоагIаш цхьа хIама зийр аз. Мехкарий, кхалнах, къонахий бале а чу, автобуса чу шоаш мара кхы саг воацаш мо даггара гIаръеш, ашараш лекхаш, сага тоам боаца бIеха дешаш юкъе дола мотт а бувцаш во кхесташ виъ зIамига саг вар. Цар еш йола гIар лоа ца луш бехк боаккхаш къамаьл дир цхьан кхалсага. Бакъда кагийча наха лерг дилланзар цо дувцачунгахьа. Ераш укхаза наха сов а баьнна, харцахьа лелаш бале а царга догдоахаш, уж чубахкарга сатувсаш багIа хургба цар цIагIарбараш, царех цхьа хIама а хеташ. ХIаьта ераш…
ГIалгIаша массаза а эздийи дикеи лаьрхIад эхь хеташ хилар, цул совгIа гIалгIашта юкъе саг вовзар а из малха валар а цун гIулакхашца, оамалца дувзаденна хиннад массаза а. МоллагIа сийдовргахьа дола хIама сага карахдаргдоацаш из зIамига бер долча хана денз наха бала цох хургбоацаш, эхь хеташ хила Iомавеш кхеву из дас-нанас.
Эхь хеташ хилар сага вахаре кертерча дикача оамалех цаI да. МоллагIдолча хIамангахьа харца уйла яле, нагахьа эхь хеташ из вале чехка хувцавала аьттув боал сага, дIахо йодача хана гIалат ца вала а, гоал ца вала а, наха дегаза цахила а. Даьла салам хилда цунна, Даьла Элас аьннад йоах: «Хьайна эхь ца хете, хьай безам бар хьаделахь», «Эхь хетар иманах да», аьнна. Кхы а-м да эхь дувцаш пайхамара къамаьлаш а, вай дай кицаш а.
МоллагIдолча халкъанна юкъе сийдолаш а, дика а, кIаьда а лоархI эхь хеташ вола саг. Эхь хетар да-кх нахах вашаш, уж шийл лохагIа ца хеташ вахар. ХIаьта шийна наIалт аргдоацача тайпара ваха вIаштIехьадалар хьаькъал долаш хилар да. Шийна наIалт ца алийта дукхача хIаманна сатохаргдолаш, дукха хIама дергдолаш хул хийла къонах. Эхь доацача сага фуннагIа а дергда, цудухьа цу тайпара хургдоацаш, тIехьагIа царех бала хургбоацаш кхеде деза бераш.
Вай даьша яьхад: «Эхь дайна вахачул сий долаш валар тол».

Матенаькъан Илез

№171 (12107), шинара, 20 ноябрь, 2018 шу / Вторник, 20 ноября 2018 года

Добавить комментарий

Ваш e-mail не будет опубликован. Обязательные поля помечены *