Самбо латарашка

Укх деношка Магаданеи Магадански областеи дIадихьача самбо даькъе хиннача латарашка дото майдалг йоаккхаш котало яьккхай цига Iоваь вахаш волча Далганаькъан Мухьаммад-lале яхача гIалгIай кIаьнка. Цох бола хоам бу цун дас Далганаькъан Руслана. Латарашка дакъа лоацаш 400 совгIа къона низъоамалхо хиннав яхьарашка.
3,5 шу мара даланза 17 кийла дозал долаш ва зIамига низъоамалхо, хIаьта Мухьаммад-Iалеца лийтараш хана цул боккхагIа а, 18 кийла совгIа дозал долаш а хиннаб. Бале а дикка дохьалэтта ший моттиг яьккхай кIаьнка. Хьалхарча кхаьннеца лета уж эшабаьчул тIехьагIа финале шийца летача виълагIча низъоамалхочунга дIаяхьийтай цо хьалхара моттиг.
Цу латарашка 4 шерал зIамагIа дола бераш дIачу ца ийдой а 3 шуи 3 бутти баьлча дIаийца хиннав Мухьаммад-Iали. ДIахойодача хана а шийна ма могга низъоамала даькъе къахьегаш толамаш доахаш дIаваха уйла йолаш ва из. Белгалде деза Мухьаммад-Iали Iоваьча хана бага цергаш йолаш хинналга. Ший яьннача ханага хьежжа а доацаш воккхача сага санна оамал йолаш, эхь хеташ, корзагIваьнна воацаш ва кIаьнк.
Таханарча дийнахьа садике а низъоамала цIагIа а ухаш ва Мухьаммад-Iали. Шиннахьа а дика кхоаву из, кхычарел тIехьа ца вусаш.

Матенаькъан Илез

№172 (12108), ера, 22 ноябрь, 2018 шу / Четверг, 22 ноября 2018 года

Добавить комментарий

Ваш e-mail не будет опубликован. Обязательные поля помечены *