Къаман Iадаташ лорадеш

Укх деношка Бурочарча ГIалгIайчен паччахьалкхен университете вIашагIкхетар дIадихьар «Къаман дувхара ди» аьнна цIи а йолаш, цига деша багIача стутденташта юкъе яхьараш овттайирца. Химико-биологический, Аграрный, Юридический, ПМНО, Медицинский факультеташка багIа кагирхой бар шоайла яхье байна къовсабеннараш. Укхаза дакъалоацаш 50 совгIа саг вар.

Яхье байнараш шоайла товсабеннабар кхаь даькъе баьча кийчамах: гIалгIай Iадат гойтарцеи, гIалгIай мотт белгалбеш стихаш е кхыдола дувцараш дешарцеи, кицаш дашхарцеи. Цар беча балха мах беш, малагIа тоаба малагIча даькъе дикагIа белгалйоал хьожаш жури ховшабаь нах а бар хIара тоабан хьал теркалдеш. ХIара даькъе кагирхоша баь болх дика товш, шоашта могача тайпара шоай говзал хьагойташ бар. Бакъда, Iадаташкахьа а, мотт бувцаргахьа а, кицаш дашхаргахьа а гIалаташ дар кагирхой. Из да вай къаман гIулакх ма дарра вайна довзаш а ховш а цахилар. Цунга хьежжа бар жюри доакъашхоша баь мах.
ВIашагIкхетар дIахьош цу гIулакха хьалхаваьнна хиннача университете Культура даькъе говзанча волча Дугенаькъан Адама дийцачох, цу тайпара вIашагIкхетараш университете хьалхара дIахьош да цар, дале а дIахо цу тIехьа къахьега лаьрхIа ба уж: «Укх тайпара вIашагIкхетар хьалхара дIахьош да оаха. Укхо тхона тахан хьа а хайтад ер мо дола гулламаш дукхагIа хиладезалга а, кастагIа хила дезалга а. ХIана аьлча, укх хIаманца бала болаш, тIабийрза дукхаш ба кагирхошта юкъе. Арахьара тIаяхкача культураша дукха керда хIама юкъедаьккхад вайна. Телевизоро а шийна могача тайпара къовсам лоттабу, тIаккха цу тIа гIолла воай къаман хIама тIехьашкататтар кхерам ба вай. Из хургдоацаш, вай къаман дувхар а Iадат а, мотт а лорабе уйла йолаш дIахьош болх ба ер. Дала аьннадале вай из шедар лора а дергда. ДIахо йодача хана вай мехкарча кхыча ВУЗашца а СУЗашца а ер болх мехка юкъара болаш дIабахьа лерхI оаха, кхувш боагIарашта вай къаман гIулакхашца чам, безам, ираз хилийта. ТIаккха цу тIехьа мехка фестиваль е а дагахьа да тхо».
Тахан дунен тIа латташ дола хьал теркал дича чIоагIа эшаш а хиланза даргдоацаш а вIашагIкхетараш да уж. МоллагIдолча хIаманна тIехьа из кердадахарца мара дIачIоагIлуц саг. Цудухьа ма могга кхоачашде дезаш гIулакхаш да уж.
Юххера а вIашагIкхетара чаккхе еш жюри доакъашхоша мах баь хьалхабайнача доакъашхоех бар ПМНО яхача факультетера Iадат гойтарахи, мотт бувцарахи хьалхара моттиг йоаккхаш, хIаьта кицаш дашхарах Аграрный факультет хьалхаяьлар. Цул совгIа, дикагIйола тоаба къоастаеш, совгIаташ декъача а хьалхабайлар ПМНО факультета дешархой.

И. Айюбов

№175 (12111), шинара, 27 ноябрь, 2018 шу / Вторник, 27 ноября 2018 года

Добавить комментарий

Ваш e-mail не будет опубликован. Обязательные поля помечены *