Библиотека ража болх бовзийташ

Укх деношка, Яндакъонгий Хамарзий Джамалда цIерагIа йолча Сунжерча ГIалгIайчен Къаман библиотеке аргIанара вIашагIкхетар дIадихьар Сунжерча №I йолча школа 9 класса дешархошца, царна библиотека ража тохкам барах бола болх Iомабеш. Цу наькъаца библиотека говзанчаша вай мехкарча дешархошца из болх хьалхара беш бац.

«Цу тайпара болх оаха вай мехкарча школа дешархошца хIара бетта дIахьош ба. Цул совгIа боккхагIболча мехка бахархошца а, нагахьа эшаш моттиг хуле моллагIа доазол арахьара тIавенача сагаца а бу оаха из болх. Ца хадаш ший Iадатах дIабодаш болх ба тха из библиографех хоамбара отдело кхоачашбеш», — йоах, библиографех хоамбара отдела кулгалхочо Кусенаькъан Лейлас.
Нагахьа санна моллагIдола хIама хатта мичча хана саг тIавоагIе цунна эшар цунга дIаоалаш долчох из дIакхетавергволаш библиотеке Iунал деш цу гIулакха говзанча волаш ва. Из доацаш библиотеке шоай база данных яхаш хIама да мохктохкара даькъе йола статьяш дIачухьож. Цул совгIа кхыча дешара Iилмашкахьа йола статьяш лаха а йиш я цу базе.
«ТIеххьара тханцига хинна дешархой лаьрхIа ба, шоаш юха а баьхка шоашта из болх бе мишта хов хьажа. Цхьан дийнахьа баьча балхаца дукха хIама Iомаде аьттув бале а деррига дагалаца а довза а кхоабиц уж, цудухьа юха а баьхка шоаш Iомабаь болх дIачIоагIбе уйла йолаш ба уж. Библиотека говзанчаша новкъостал дарал совгIа, из болх царна шоашта бовзаш, ховш хилча дика да, хIана аьлча тIехьагIа библиотека болхлой хила а тарлу царех, цунцара чам сов а баьнна», — йоах дIахо Лейлас.
Из болх Iомабе дешархой тоабаех ухе а боккхагIбараш цаI е шиъ воагIаш хул библиотеке цох библиографех бола хоам шоашта бовзийтар а хьехар а дехаш, царца а къаьста болх бу библиотека викалаша. МоллагIа ГIалгIай мехка гIолла долча хIамах бола хоам лаха аьттув ба наьха, цул совгIа Къаман библиотеке болаш ба Россе библиотекашкарча библиографешка тIакхачарах бола аьттув.

И. Айюбов

№180-181 (12116-117), ера, 6 декабрь, 2018 шу / Четверг, 6 декабря 2018 года

Добавить комментарий

Ваш e-mail не будет опубликован. Обязательные поля помечены *