ГIалгIай мотт хьехара наькъаш

Укх деношка, Ярославле кепа а теха, цIаденад «7 класса лаьрхIа дола гIалгIай мотт хьехара наькъаш» яха книжка. Хьехархой говзал лакхъяра института дехарах, из яздаьр со ва. МалагIа декхараш да цунна хьалхашка латтараш? Из яздаь вола со а цун редактор вола Мургустов Салмана Мухьмад а, гIалгIай мотт хьехача наха гIо-новкъостал де хьежад.

7-ча классе ерригаш 64 параграф я Iомаеш. Царех хIаранена хетаяь цхьацца урок я. Вешта аьлча, параграфий дукхалга хьежжа я урокаш а. Карарча хана ФГОСа (федеральни паччахьалкхен дешара стандарташ) дIадехараш а керда арадаьнна 7-ча классанна меттах дола книжка а теркалдеш, яздаьд методически кулгал. ХIара темах яьржа план я, тема Iомаяь яьккхача, яздайта могадеш дола диктантий массехк тайпа деннад, хьехархочо шийна бакъахьа хетар хоржаргдолаш. Упражненеш мишта е еза белгалдаьд, деррига декхараш кхоачаш а деш. Дувцар дикагIа кхетадайта дагахьа, юкъекхийлай схемаш, таблицаш, бе-бе декхараш (тесташ) а тIадуллараш а. Эрсийи гIалгIайи метташта юкъера бувзамаш чIоагIду, шинна меттала болх а беш. Из дукхагIча даькъе таржамашца хоттабенна ба.
Укх тIехьарча 20 шера со болх беш хьавоагIа Сурхо тIарча ООШ (ийс шера деша школа). ДукхагIйола книжканна юкъеяха урокаш ханаца чIоагIъенна, этта я. Уж дика кхетаю, Iомаю дешархочо, нагахьа санна деша безам болаш вале.
Классе дIа а этта, дIахьеха мара ца езаш, кийча я шейоа урок. Пайда эца мегаргба цу урокаш тIа кердача технически гIирсех: интерактивни улгах, видеоматериалах, компьютерах, бе-беча таблицех, иштта кхы дIахо а.
Дешархошта духхьал темаш йийца ца Iеш, бакъахьара кхетам лургбола оагIув вIаштIехьаяккха хьежад тхо. Масала, методически кулгалга гIолла берашта довзийта йиш я Iалам лорадара дош, Даьхен сий дар, из лархIар, хьу лораярца, спорт езаялийтарца, унахцIено лораярца дувзаденна дешаш, кхыдараш. Цул совгIа, цхьаццайолча балха говзалца ювзаенна урокаш а я книжка тIа. Дешархошта тайп-тайпара балхаш харжа гIо ду моттигаш юкъекхийлай цунна.
Лакхе хьоахаяьрел совгIа, кхы дукха хIама чулоац бувцача балхо, 7-ча классе хьехаш болча нахá наьна мотт хьеха атта а сакъердаме а хулийтаргда аьнна хет цу тIарча йоазоша. Книжкан эггара тIехьара оагIув, оаш цох йола шоай уйлаш дIаязъергйолаш, яьсса йитай. Хьехархоша цох шоашта хетар яздарга сатувс аз.

№188-189 (12124-125), шоатта, 15 декабрь, 2018 шу / Суббота, 15 декабря 2018 года

Добавить комментарий

Ваш e-mail не будет опубликован. Обязательные поля помечены *