Цхьан Ia даккха бартбаь вIашагIкхийтта виъ новкъост

ДIаяхача ханий цхьан замалахь, цхьана Iа доаккхар вай, аьнна, вIашагIкхийттад-чаи, борзи, цогали, хьакхеи.

Цхьаккха а гола ца хоалуш, тоIадаь кагех диза галий санна, ерстача хьакхийга, кIалгIолла, бага шод лелхаш, бIаргаш кхоабаш хиннаб вокх кхаьнне.
Цкъа ший гIулакха яха хьакха шоашцара къаьстача гIолла, кхетачен тIа вIаший дага а дайнна, бapт баьб цар…
Ена юха кхаьчай хьакха. Борзи, цогали айденнад… Ча, ший мекъалла, из бу санна, дола доккха дегI хьоаде ца ловш, меттахьа яьннаяц. ХIаьта, ела-м из а къажаьй. Из бIарга ца гу дукха ха йолаш саннаг дехьа а, сехьа а доалаш, хьакхийна гIоздаьнна хьайзад цогал. ГIатта дIайолаеннай борз.
– ДIа ма гIо, юхайола… ДIадала, Iоха хьо а… Хьо ма чIоагIа гIоздаьнна хьувз, хIанз мара кхы вIаший бIрга ца гуш-х мичад вай, — аьннад чайво.
Борз а, цогал а йижа уллача хьакхийна уллув, чана хьатIа а дийрза, Iохайшад.
– Тахан се цхьаь йисача хана цхьа хIама дагадеха ма иллай со, — аьннад чайво.
– Хьадувцал хьай, фу дар из? — аьннад берзо.
– Дувцал даьллахь!.. Дадар хургдар из, хьона дага деха дале, харцахьара хIама-м, – аьннад, цогало, батах мотт хьокхаш мерза къург а баь.
– Вайна ховш ма дий Iа дIаьхеи, шийлеи хилар… Деций? ХIанз вай боацча кхоачамца ер къиза моцал Iовшаш, бIаьстанга довлалургдац вай… Дий? БIаьстий юха дийнъергйолаш со е шоашта, бIаьстий яллалца шо мед ца далийталла хIама йоалла хургья шоана сох, са дулх дуаш, Iангара довла шоашта, – аьннад чайво.
– Айя… дIайиллахь… Хьо хьанга юалургья, цIена даьтта мара, дулхах хIама мича доал хьох-м, аьннад цогало.
– БIаьстий юха дийнъергйолаш-м, со яа шоашта, хIаьта, — аьннад берзо.
– А… хьох-м, цергаш хац сона, топ а низткъа мара латаргйоацаш, лила мо сийна, пхаьнаш мара хIама мича доал, – аьннад чайво.
– ХIаьта со де шоашта, — аьннад цогало.
– ДIадала хIанз хьо-м мосий орг мара хIама мичай, — аьннад чайво.
– ХIаьта, бIаьстий юха дийнъергйолаш, со мегаргьяцар-те оаш яа, — аьннад хьакхо.
– Мегаргда, хIаьта, оаха бIаьстий юха дийнъергья хьо, — аьнна, тIадеттаденнача цар йийна яьрда Iойиллай хьакха.
– ГIо, чехка е чураш йиле дувла шо шиъ – аьнна, борзи, цогали хи тIа дахийтад чайво.
Чураш юлаш доахкаш, махьаро дикъача дамагIашта шоаш тIакхаьчача:
– Е дамагIаш даъ вай? — аьннад берзага цогало.
– Айя… дIадиллахь, хIаьта-м чайво, доадаь а дутарг даьра дацар вай, — аьннад берзо.
– Айя… дIаяла, цу селларча дулха юкъе уж дамагIаш зувш йоалларгья из… Уж-м кертах а даьра доахаргдацар цо, – аьннад цогало.
– Нагахь кертах доахе? — хаьттад берзо.
– Цунах ма кхералахь, из-м аз хьо цецйоаккхаш дIадерзоргда хьона, — аьннад цогало.
– Мишта? — хаьттад берзо.
– ДамагIаш мича дахад, аьнна, цо уж кертах доахе, хьо сона бIарахьажалахь. Цига денз дIадар аз айса дIадерзоргда хьона, — аьннад цогало.
Цига дIахайша дамагIаш а диаь, юхейиса чураш а ийца, ча йолча юхадахад цогали, борзи шиъ.
Цхьацца-цхьацца хьаэцаш дIаюллаш, чураш къоастаяь ше яьлча, шиннена а эгIазе бIара а хьажаь, аьннад чайво:
– Мича дихьаьд оаш укх юкъера дамагIаш?
– Хьахьий, дIадерзаделахь ер хIанз Iайха, — аьлча санна, борз цогала бIарахьажаьй.
– ЭххIий, дадала хьа, аз ма даа яххаше а, дамагIаш а диаь сона хIанз бIара сенна хьеж хьо? – аьннад цогало.
ДIатIа ча а тоссаеннай, дIа борз а ийккхай! Борз хьалхеи, ча тIехьеи удаш гаьна дайннад уж.
КIаьд енна ше оттача кхаьчача:
– XI-e-й, дIа ма гlo, юхаерза!.. Пайда бац цун… Iа диаь уж дамагIаш хьона доагIача даькъаца лоархIаргда вай, — аьннад чайво.
Кхераенна борз хьалхеи, эгIазъяха ча тIехьеи, уж цигара дIалелххашехь цогало, дIаюстара а даьнна, мIараш хьекхаш чехка кIоаг а баьккха, токкхаяь йихьаь хьакха лаьттах еллай.
ЮхайоагIа уж шиъ бIарга ма яйнге а, бIаргашка тIод а хьувзадеш, делха хайнад цогал.
ДIа-юха хьежача тхьовра шоаш хьакха йийнача делхаш дагIа цогал мара, хIама бIарга а ца дайна, аьннад цар:
— Айя, мича йихьай Iа хьакха?!
– Кхоачаш со яа а йолаялехьа, сел барт ийгIа лелача акхар, бIаьстий юха дийн-м мичара йора со, дала лорйойла со селла барт ийгIача нахах, ловча хийла со дамагIаш доацаш а, аьнна, дийн а енна, дIаийккха яха-м даьра яхар, — аьннад цогало, хьаIанге даха делха а дилха.

Кийчдаьр
Матенаькъан Илез

№191-192 (12127-128), ера, 20 декабрь, 2018 шу / Четверг, 20 декабря 2018 года

Добавить комментарий

Ваш e-mail не будет опубликован. Обязательные поля помечены *