Найц

Уст-даь вордаца хьунагIа дахча да ваха хиннав, цхьа мекъа найц. ХьунагIа хьалкхаьчача, говр цхьан гаьнах дIа а йийхка, цхьа кIеззига Iовижа са а леIа дIаволалургва-кх со дахча даккха аьнна, дIагарахьа ваьннав кхы Iа яха, болх бе безам боаца найц, цига уллаш мерза тар а кхийтта дIатхьайсав ер.
Ер наб а яь хьа сомаваьлча, говри, вордеи доацаш хиннад. Ше фу дергда ца ховш, дог а деха, ший диг бе а делла, цIенгахьа волавеннав мекъа найц. Ишта чувоагIаш, дIахьажача Iам чу лувчаш йоаллаш акха боабашк бIарга яйнай укхан, ваьсса чуводачул яа боабашк а ийца вахача бакъахьа ва-кх со аьнна, лостадаь диг кхессад укхо боабашк е дагахьа, диг дIа а ца кхеташ Iам чу Iочудахад.
Iочудаха диг хьалаха аьнна, тIера барзкъаш Iо а даьха Iам чу кхосса веннав найц. Диг кора а ца доагIаш ер Iам чура хьаара ваьлча, укхан барзкъаш, доацаш хиннад.
Дийнахьа верзана чуваха йиш а йоацаш баьд ерзалца хьуна петарашта юкъе а ваьгIа, чувахав найц.
Шийна хиннар сесагага дIадийцад укхо.
— ХIама дергдац, — аьннад сесаго. – Из мел дола хIама, ахчо метта оттадергдолаш да. Цхьабакъда сона хинна зе, со енна дунен чура дIаяллалца метта оттаргдоацаш да, — аьнна.
— Фу зе да из, селла доаккхадар? – аьнна хьаттад цецваьннача маро.
— Хьога маьре яр да-кх! – аьнна жоп деннад сесаго.

Хамхой Бекмарзий Дауд

№193-194 (12129-130), шоатта, 22 декабрь, 2018 шу / Суббота, 22 декабря 2018 года

Добавить комментарий

Ваш e-mail не будет опубликован. Обязательные поля помечены *