Ачалкхера даькъа тIара больница ший болх дIахо хьош я

Вай мехка ширача учрежденех цаI я Ачалкхера даькъа тIара больница. 1927 шера хьалъяьй из. Духхьашха Ачалукский района лаьрхIа хьайийла хиннай из. Цул тIехьагIа, тIом латтача хана, госпиталь хиннай из. 1982 шера цIи яьнна, яьга хиннай. Цу хана денз, вай республика хьаяь ши шу даллалца йолча юкъа лорий амбулаторий хиннай. 1996 шера денз хьа Ачалкхера даькъа тIара больница йолаш болх беш я, бахача наьха могашал лораера а меттаоттаяра а гIо-новкъостол деш.

Цхьабакъда дIадахача кIира халкъа юкъе хабар даьржадар из дIакъовлаш я аьнна. Из мел бакъда ха а, больница хиланза яргйоацилга белгалдаккха больница коа вIашагIкхийтта хилар кхаь Ачалкхера нах. Гулбеннарашца вIашагIкхеттар хилар МогIалбика района кулгалхочун Долтмарзнаькъан Хьамзата а Могашала кхерамзлен министра Арапханнаькъан Марема а. Министро белгалдир больница дIаяккха лаьрхIа хIама доацилга. МогIалбика района юкъара больницах дIатохар да аьлар цо дувцаш дар. Из цадар дийхар вIашагIкхийттачар, цу больнице латташ дола низам дохар кхераш.
Бахача наха дувцачох кхийттача министро Арапханнаькъан Марема, больница цхьаннахьа дIа а ца тохаш ше йолчча дарже болх бе ютаргья аьлар. Бакъда цхьацца бола болхалой дIабоахарг хилар соцадаь да. ДIабоахачарна юкъе лораш гIоргболаш бац.
Ювца яьнна йолаш, Ачалкхерча больница болх мишта дIабода дувцар дийхар оаха, цига керттера лор волча ГIоандалой Iумарбикага. Цо тхога ма аллара больницера болх ларттIа дIабодаш ба. Стационар а, ший хьалха хиннача тайпара, болх беш хургья, хIанзалца мел хинна менгеш а долаш.
30 сага лаьрхIа йолча стационаре ши лор ва. Стационарал совгIа цу учрежденена чуйоагIаш я амбулатори. Цигача шиъ даькъа тIара лор ва, шиъ терапевт ва, гинеколог я, церги лор ва.
Укхаза шийна дарба лаха ва йиш я Ачалкхешкара совгIа моллагIа вай мехка вахаш вола саг, цунга медицински полис хуле. Уж морга бараш хула а хул укхаза – Назранера а, Зязик-Юртара а МогIалбикера а, Инаркъера а, иштта кхыча юрташкара а. Цо хьахьокх ер моттиг мел дарбане я. Таханарча дийнахьа берригаш а больница тIаяьзбаь 4784 саг ва. Нах укхаза дарба а деш баьде, дарба а хиле чIоагIа раьза болаш цIаболх. Укхаза бадачарга, баьдачарга а ладийгIача больнице хила ма еза цIена а я, даар а дика да, йIаьйха а я. Сона сайна а хайнад укхазара болх цIенхашта унахошца бала болаш, царна йоагIа терко еш дIабодалга. ХIана аьлча тха нана а, иллай укхаза дарба деш.
Iумарбика ше яхачох цо болх беш йоаккхача хана цунга цхьаккха лоткъам кхаьчабац унахошкара. Укхаза болх беш боахкараш ларттIа говзанчаш болга гучадоал хьавенача унахочоа. Бакъдар аьлча, отделени цаI мара яц укхаза – терпевтически. Дог лазаш а, давлени ийлуш а хул укхаза боагIа дукхагIа бола унахой. Цул совгIа неврологически лазарашта а дарба ду укхаза, унахочо невролагаца консультаци яьчул тIехьагIа.
Цхьан смена 100 гаргга саг чувоагIа укх больнице дарба лохаш. Стационаре лакхе хьоаха ма дарра 30 менги ба. Шера стационаре дарба даь верзаву 900 гаргга саг. Иштта 7 меттиг дийнахьа дарбдайташ, бийсаш шоай цIагIа йоахачарна лаьрхIа я укхаза. Цигача верзаваь ваьннав укх 2018 шера 330 саг. Вешта аьлча, ший балха план йизза кхоачаш еш я Ачалкхера даькъа тIара больница.

Бохтарнаькъан ХIарон

№197 (12133), ера, 27 декабрь, 2018 шу / Четверг, 27 декабря 2018 года

Добавить комментарий

Ваш e-mail не будет опубликован. Обязательные поля помечены *