Даькъала хилда керда шу

ХьатIа а кхаьча, вай коанаIарех хьачу а хьежаш латташ да керда 2019 шу. Дунен тIарча дукхагIа мел болча наха деза а, камаьрша а, иразе а цIай лоархI цох. ХьатIаэттай дIадахача шера хиннача вахара боарам къоастабе беза ха, – хIанзчул тIехьагIа де лерхIачун мул баккха беза ха. Вайна дага мел доагIача хана хиннад иштта, дIахо йодача хана а хургда.

Декабрь бетта 31-ча дийнахьа чакхдоал ер дукха атта хиннадоаца 2018 шу. Атта боаца никъ, дIахойодача хана дахар цо дIакховдадергда керда хьахулаш долча 2019 шерага. Цо гIад а даха, камоаршалца тIаэцаргда из. ХIана аьлча хIара сахьат, минот, секунд дукха хеташ долхаш да денош. Иштта бутт а, шу а чакхдаргда.
Сиха дIадахар ер шу, бакъда, хьадаьча, карагIдийнача хIаманга хьежача, воккхийве а гIадваха а хIамаш корадоагIа. Духхьал мехка хиннача хувцамех аьлча а да дукхача тайпара тоаденна, дог гIоздоаккхаш толамаш. Ха е ахча ца тоъаш, кхоачаш ца деш дисараш хьахалачу 2019 шера кхоаччаш хьалдиза хьожаргда вай, Дала аьннадале, массадаргаш а цхьана. Къаст-къаьстта дечул, дуккха а шийгахьа пайда болашагIа хургда вай цхьана хьадаьр. Цул совгIа эр-безам а совбоал тоабанца лелача наьха.
Укх Iадика ювцаш долча шера ше йоаяьча ханагеи цу чухь ше кхоачашдаьча гIулакхашкеи хьажача ховргда сага ший фу карагIдаьннад. Цунга хьежжа уйла йоре, бакъахьа хетар сона вайх хIаране. Уйла йича хеталу, даьчул дуккха а дукхагIа хIамаш де карагIдаьнна хургдар-кх, аьнна. Из уйла вай массане йича бакъаха хет сона, тIадоагIача шера цхьа минот, цхьа юкъ лоадам боацача гIулакха йоаергйоацаш.
Керда шу хьатIадарца, дерригача дунен тIа санна, вай мехка а цхьацца наьха дог гIоздоаккхаш вIашагIкхетараш дIакхухьаш ба нах. Школашка, садикашка берий дог гIоздоаккхаш, царна цхьацца совгIаташ декъаш моттигаш а я дукха. БоккхагIчарна ца хуле а кагийча берашта чIоагIа салоIам а дега-гIозал а хул цох. ВIалла ший аьттув бале шийна ховча долча къеи, халеи боахкача дезалерча берашта укх юкъа уж фу деш ба вай хьажача, царна совгIаташ дийкъача гетара маьл болаш хургдар вайна.
Тхьовра лакхе айса аьннар кердадоаккхаш, цIаькха а ала хьашт дар сона, цхьа минот, ха йоа а ца еш, вай дезала, цIенна, юрта, шахьара, мехка дикадар ловш, вай къахьегар – из дар вайна даькъала керда шу. Цул совгIа барт болаш вай дахар – бакъдолчунна тIехьа барт болаш. Хало ца хулаши, вас ца хулаши, хIама новкъа ца хулаши саг вахац укх дунен тIа. ХIаьта а, кIезиг-мезиг долчоа са а тохаш, вIаший тIера а долаш, вIаший дезаш, воайла эшача хIамангахьа накъадувлаш вай дахе вахар аттача даргда.
Дала даькъала долда вай массайолча ханашкахьа. ХIаьта укх хьахулача кердача шера дуккха дика хIамаш хьаде аьттув а боалаш, вай мехка хьал тоа а деш дIадаха Дала аьттув лулба вайна. Даькъала хилда керда шу!

И. Айюбов

№198-200 (12133-135), шоатта, 29 декабрь, 2018 шу / Суббота, 29 декабря 2018 года

Добавить комментарий

Ваш e-mail не будет опубликован. Обязательные поля помечены *