Доагамашта дарба дар

«Интеррекорд» яхача, рекордашта регистаци еш йолча Халкъаштаюкъера агенства Керттера кулгалхо Копылов Влад ГIалгIайче вена хилар укх мехкарча дарбанхочоа Гайсананаькъан Лийдайна, рекордах дола итт сертификат дIадалар духьа. Ала деза Лийдас тайп-тайпарча доагама лазарашта дарба деш дунен юкъе лакха рекордаш даьхад, аьнна.
Мехкара воаца хьаьша а, Лийда а ше волча ГIалгIайчен унахцIенон министр Iарапханаькъан Марем а йолаш тIаийца хилар Мехкдас Евкуранаькъан Баматгире Юнус-Бека.
«Шера экспертиза йоккхаш къахьийгад оаха, Гайсананаькъан Лийдас хица, химияца, эккхамца, цIараца, иштта кхыдолча а бахьанашца хиннача доагама лазарашта духьал къовсам лоаттабирца дарба деш хьаяьча мазьех бакъдараш тохкаш. Деношца эггара чехкагIа саг веррига а верзавеш дола дарба да из. Цудухьа, тахан оаха Лийдайан лу рекордаш овттайирах дола 10 тешал-сертификат – 5 халкъаштаюкъереи, 5 российскийи», — аьнна белгалдир Копылов Влада, хьегача къих Лийдайна Баркал а оалаш.
Цо яхачох, ше хьабеча балхах дола каьхаташ агенстве дIакхахьийта хиннад Лийдас, ше доагама дарба делехьа а дарба даьчул тIехьагIа а даьха сурташ а гойташ. Деррига дарба дара гIулакхи мазьи ший бокъо а йолаш болх бе йиш йолаш да, «Федеральный институт промышленной собственности России» яхача юкъарчено къоабалдаь. Бакъда, моллагIдолча хIаманна тIакхача а из тIехдика чакхдаккха а къахьега деза. Лийдас ше яхачох, дукхача шерашка хьийга къа да тахан из цу лагIа тIа оттаяьр.
«Из, тха дезала Iадат да. Хьалхара молха дагаехар са нана яр, са воккхагIвола воша воагаваьча хана. Укх мел долча шерашка тхоай болх тоабеш, говзал лакхъеш къахьийгад оаха. Тха молхаша муъаш а дитац, лазар а дайду. Керттерадар да, оаха деш дола дарба баьцовгIаи, дийнатийи хьоаналах деш хилар. Цо сага дегIа могашала деш цхьаккха зе дац», — аьнна дийцар Гайсананаькъан Лийдас.
Баматргире Юнус-Бека мехка УнахцIенон министерствона тIадиллар, Москверча доагама юкъарченца бувзаме а байле, Лийдай молхаш паччахьалкхен тайп-тайпарча дарбанчешка дIа-хьа яржаргйолаш къахьега, аьнна.
«Москверча доагама юкъарчен Лийдай болх дIабовзийташ царца вIашагIкхетар де деза. Иштта госреестре регистрацие е а еза вай мехкахочун молхашта, кхычахьа а наха шоашта цунца дарба дергдолаш», — аьлар Евкуранаькъан Юнус-Бека.
МоллагIа тайпара доагама даькъе могаш боацача наха дарба де кийча я Гайсананаькъан Лийда. Ше дарба дIадоладалехьа лазарага а хьажа цо хьаоал саг цох верзаргва е вац.

И. Айюбов

№198-200 (12133-135), шоатта, 29 декабрь, 2018 шу / Суббота, 29 декабря 2018 года

Добавить комментарий

Ваш e-mail не будет опубликован. Обязательные поля помечены *