Кердача шераца даькъала дувцаш

Iадат а хинна дIаэттача вIашагIкхетаре ГIалгIайчен Мехкдаь администраце 300 совгIа бераш гулденнадар массайолча мехка миIингашкара дийха. Царца цхьана цIайга дакъа лоацаш дар къе боахкача а, дукха бераш долча дезалера а, могашал дика йоаца а, дика дешаш белгалдайна а, мехка гIончий хила кийча дола а бераш, иштта цар дай-ноаной а.

ЦIай доладелар фаьлгашкарча персонажа гIирс бувхаш хиннача къонача хьежархой театра арстисташа хьаделларца. ВIашагIкхетар дIадодаш хьаьшашка моаршалца дош оалаш йистхилар Мехкда Евкуранаькъан Баматгире Юнус-Бек. ХьатIадоагIача керача шераца, хьоасташ даькъала дийцар цо деррига бераши цар дайи-ноанойи.
«Аз дег тIара даькъала дувц шо хьатIадогIача кердача 2019 шераца. Шун вахар хьалдузалда цо гIаддахара гIулакхашцеи, кердача толамашцеи. Шоай хьамсарчар гIаддугаш, дог хьесташ дахалда шо, хIара цIагIа паргIато а йIовхал а йоссийла шун. Шоана могашали, машари, дикали аьттуви хилар лов сона», — аьлар, Евкуранаькъан Юнус-Бека, кердача шераца Мехкдаь администрацен хьаьший даькъала бувцаш.
ДIахо къонача хьежархой театра артисташа «Надж-ган цIай» яха кердача шера хьокхам гойтар гулбеннарашта. Иштта берий дог хьоасташ а уж гIаддугаш а дар, тай-тайпара хинна конкурсаши, сакъердаме халхари, фаьлга хьисапе кийчдаь пенаши, къаьга сийрда еррига программаи.
ВIашагIкхетар чакхдоалаш кагийча хьаьшашта ГIордаде хоза совгIаташ дийкъар, цул совгIа артисташца лезгинках халха байлар уж, шоашта салоIам хиллалца.
ГIулакх чакхдаьлча а дукха дIа-хьа къаста сих луш дацар гIаддаха, товр хинна бераш. Шоайла бовзаш а гIордадеца сурташ доахаш а ха дIайихьар цар цхьана.

Матенаькъан Илез

№198-200 (12133-135), шоатта, 29 декабрь, 2018 шу / Суббота, 29 декабря 2018 года

Добавить комментарий

Ваш e-mail не будет опубликован. Обязательные поля помечены *