Кортахьовзаберга корта хьовзабар

Хетаргахьа, Кубик Рубика бIаргйовнза а, бейолланза а саг хургвац. Тайп-тайпарча бесаех йола из вIашагIъехкарг моллагIча сага караерзае могаш чоалх яц.

«Кубик» яха кортахьовзаберг эггара хьалха дагаехар ва Эрнё Рубик. Из керда белгало гучаяьннай 1974 шера.
Уйла тIаяхийта езаш дукха болх ба цу кубикацарбар. ХIаьта из болх караберзабе могаш наггахьа саг мара нийсалуц. Цу дукха боацачарех ва вай мехкахо Мужахой Амир, 18 шу даьнна юристал дешаш вола зIамига саг.
«Дагалоацам чIоагIа болаш а, черчени, геометри дика ховш а хила веза укх гIулакхаца чам бола саг», — ше болабаьча атта боацача наькъах дувц вайга Амира. – «Эггара хьалха Кубик Рубика вIашагIйолла хьажар сосай диъ шу даьннача хана. Цул тIехьагIа тоъал ха яьккхар аз из вIашагIа ца йоллаш. 16 шу даьннача хана юха а са бе кхаьчар из дукха уйла яйташ бола болх. ТIера ца воалаш, вIашагIъехка ваьлар со! Каст-каста толамаш гучадувла доладелар. ТIаккха халагIа-халагIа мел долча наькъашца тахкар аз Кубик, цун хIара къайле караерзаеш».
Эггара чIоагIагIа а халагIа а болчох болх ба бIаргаш а къайла Амира вурийтта минота вIашагIъелла, халача оттамах йола Кубик. (6×6×6)
Ший дешар а, болабаь говзала никъ а дика дIабахьа вIаштIехьадоал Амира. Гуманитарни а, технически а гIулакх леладе мог къахьега лаьрхIа волча дешархочоа! Цун уйла я ший начIал совдаккха, кхы дIахо дIайодача хана халагIа долча оттамашкахьа котало яккха!
Мужахой Амира лерхI Россе мехка къаьстта рекорд яккха. ХIаьта цу гIулакха Амирал хьалхаваьнна саг вац таханарча дийнахьа! Дог доаха, Россе дозон тIа а дерригача дунен тIа а цу даькъе Амира хьалхара моттиг яккхар.
Дала аьттув боаккхалба цун дага мел латта толамаш кхоачашде!

Новрузанаькъан Макка.

№ 1-2 (12136-137), шоатта, 12 январь, 2019 шу / суббота, 12 января 2019 года

Добавить комментарий

Ваш e-mail не будет опубликован. Обязательные поля помечены *