Машенаш вIашкаетталуш хулача хатарех дийцар аргIанарча кхетаче

2018 шера 11 бетта ГIалгIай мехка баьча балхах машенаш вIашкаетталуш хулаш дола хатараш лохде карагIдаьннад керттерча кхаь гойтамах: машенаш вIашкаеттаялара дукхали, байначари, лозабаьчари таьрахьи. Хила тарлуча хатарах нах дIакхетабеш хьинаре къахьегаш дIакхихьа вIашагIкхетараш бахьан долаш аьттув баьннаб цу гIулакхагахьа толам баккха. Цох бола хоам бир, ГIалгIайчен Мехкдас Евкуранаькъан Юнус-Бека тхьамадал а деш дIайихьача кхетаче, мехка гIолла йолча УГИБДД кулгалхочо Лодыгин Валере.

«2018 шера 11 бетта ГIалгIай мехка доазон тIа дIаяздаь машенаш вIашкаетталуш хинна 1913 хатар да. Цига 59 саг веннав, 335 – лозабаь човнах хинна ба. Цу юкъа машенаш вIашкаеттаелара таьрахь лохденнад 20 кхаччалца (9,4%), бейнача наьха таьрахь лохаденнад 18 саг, (23,4%), хIаьта лозабаьча наьха таьрахь – 11 сагага кхаччалца (3,2%)», — аьнна белгалдир Лодыгин Валере.
Цо яхачох, ГIалгIай мехкарча наькъашка машенаш вIашкаетталуш хатараш хургдоацаш УГИБДД болхлошта ларца дIакхохьаш, нах дIакхетабеш дукха вIашагIкхетараш да машен лоаллаш болчар бокъо лораергйолаш.
«2018 шера дукхагIа хатар хулаш йолча районашка 62 вIашагIкхетар дIадихьад тха болхлоша, хила тарлуш долча хатарах лаьрххIа нах дIакхетабеш, царна хьехам тIехьа доагIар хьалха доаккхаш. 2018 шера май бетта денз ГIалгIайчен доазон тIа массал лораеш йола 55 тIахьожама моттиг болх бе йолаеннай, 5 наькъаш къастача лелара бокъо мишта лорае еза белгалдоаккхаш моттиг а нийсъяьй. Из кхоачашдар бахьан долаш, хало йолча наькъашка машенаш вIашкаетталуш хула хатараш кIезигагIа нийсденнад», — аьнна тIатехар УГИБДД кулгалхочо дIахо.
Цул совгIа, наькъ тIара бокъо йохаеш, маларах веха волаш, е машен дIатеха бокъо йохаяь нах хьагуча бахар духьа хьакхелла лIаьрххIа тоаба я, хьалххе а цу тIехьа къахьегаш болх беш. Лодыгин Валере яхачох, хийла нах лоазабеш е бовш хатар хиннача бехке вола саг хьалаьцача хьалха цу тайпара зулам дирах гIод теха хул. Цох хов вайна мел сагота бац зуламхой шоашта гIод техадар е дацар аьнна.
«2018 шера 11 бетта Госавтоинспекцен болхлоша хьагучадаьккха ч. 1 ст. 20.25 КоАП РФ, яхача законах хьожадаь 1913 административни дохадаь гIулакх да. Уж кхеле дIахьожадаь да цига тохкаргдолаш. Наькъашка хатар хилара бахьан а мах а тахкача дукхагIча даькъе гуш дар да, бехкебараш хьалха дIаяхача хана бехктокхаме эза хинна нах хилар», — аьнна белгалдир доклад ешаш хинначо.
11 бетта ГIалгIай мехка доазон тIа машенаш вIашкаетталуш хиннача 1913 хатарех 59 саг валар яхар, хIаьта 335 лозаваь хилар вайна доккха таьрахь да. Бакъахьа дар машен лоаллаш волчо ше цун дIа рулага халехьа ше вала вода, е лозаве вода, е ший цхьа гIулакх даккха вода уйла йоре.

Матенаькъан Илез

№ 1-2 (12136-137), шоатта, 12 январь, 2019 шу / суббота, 12 января 2019 года

Добавить комментарий

Ваш e-mail не будет опубликован. Обязательные поля помечены *