ТIеххьара хиннача «Яьгача сискалах»

Укх хьахиннача 2019 шера «Сердало» хьалхарча номера лаьрхIа дола, сай мугIараш хетаде безам ба са, вай къаман кхаа хулаш 2018 шу дерзадеш кердача шера накъа а долхаш хиннача тай-тулакха. Вай ПТРК «ГIалгIайче» массаза кийчьяьй кердача шера хетаяь йола салоIаме цIай сайренаш. ТIехьарча шерашка «Яьга сискал» аьнна, цIи йолаш хьокхамаш хиннад. Бакъда уж дерригаш а эрсий меттала хиннад тIеххьарчунга кхаччалца. Эрсий мотт-м вай цун баркал ала дезаш ба, цунга гIолла вайна Iилма довзарах, кхыдолча халкъашца юкъ-моттиг лелае гIо дирах а. Из ерригача Россе паччахьалкхен юкъара мотт ба. Бувца ха дезаш а да вай Россе гражданаш хиларах. Амма моллагIча къамах къам хьадеш йолча культура хьалха латтар цун ший мотт ба. ХIаране син мерзаш дийна лоттадер уж леладер а Дала хьакхоллаш цун бенна мотт ба. Цунга хьажжа шийна Дала бенначунца дикагIа са мукъа а доал. ХIаьта укх кердача шера хетаяь хинна «Яьга сискал» белгальяьлар вай меттал хиларца. Из бахьан долаш вIалла ца хиннача тайпара дега гIозал хилар кердача 2019 шера цIайна хетабаьча «Яьга сискал» яхчаа хьокхамах. Цул совгIа, вай халкъа культура дегIаяргахьа бола гIа баккхар а хилар цох.

Ховш да, вай мехка арахьара хьачубаьхка кхыча къамах нах бахалга, дукха беце а. Амма цар вай сискалах тийша хIама дац, вай санна шо-шоай къаман кхача болаш ба уж. Тахан вай мехка вахача туркечоа а хала дац спутникови антеннаца ший меттала дола канал хьалаца. Эрсечоа хIете а атта ма дий. Цудухьа «Яьга сискал» геттара йоагIаш программа хилар аьнна хетт сона къаьстта гIалгIай меттала.
Лакхе ма аллара вIалла ца хиннача тайпара салоIам хилар вай телехьежархошта «Яьгача сискалга» хьожаш. Вай мехкахой цIерагIа баркал ала лов из вай меттала хилийта даг дехачарна а, ПТРК «ГIалгIайче» кулгалхочоа а, из сайре кийч мел яьчарна а, дIайихьачарна а, хьагойтачарна а.
Дахалда вай къам а массадола дунен халкъ а, Дала деннар лорадеш, шоашта юкъе машар лоаттабеш!

Х. Эги

№ 1-2 (12136-137), шоатта, 12 январь, 2019 шу / суббота, 12 января 2019 года

Добавить комментарий

Ваш e-mail не будет опубликован. Обязательные поля помечены *