АргIанара тIема тоаба накъаяьккхар ГIалгIайчено

Сирийский Iарбий мехка дIайодаш йола ГIалгIай мехкара тIема тоаба накъаяьккхар укх деношка. Цига бахараш ба тIема гIулакхерча батальона полицен 19 къаьсттача мотострелкови бригада 281 саг. Вай мехкахоша цига кхоачашдергдола керттера декхар да, Сийре мехка маслахьат дара тIехьа болх дIабахьар.
Шолж района Эбарга-Юрта тIема гIулакх кхоачашдераш накъабоахача ваха хилар Мехкда Евкуранаькъан Баматгире ЮнусБек. Иштта цига дакъалоацаш хилар мехка тIема полици урхлен кулгалхо, полици майор Харитонов Александр, тIема-политически балха 58 арме командира гIонча Зайцев Василий, лаьрххIа хьожаяьча батальона имам Гудантнаькъан Аюп. Иштта 291 артиллерийски бригада тIема оркестр а, тIема гIулакхдечар дезалий доакъашхой а бар тIемхой накъабоахача баьхка.
«Тахан Сирийский Iарбий мехка шо долхаш да шоашта хьалхашка овттадаь лаьрххIа дола декхааш кхоачашдар духьа. Шоай гIулакхашца, масалца дIагойташ хила деза шо массаза а российски лаьтта чIоагIдеш хинна хоза гIулакх, эздел хувца йиш йоаца лерхIамаш долга. Вай тIемхой къонахчал, денал, мехкацара безам, Даьхе моастагIчох лораяр долга ховш хила деза шо», — аьлар Мехкдас тIемхошка.
Цо хьалхадаьккхар ГIалгIай мехкара бахача тIемхоех йиълагIа командировка из йолга. Хьалха хиннача кхаь командировкай кулгалхошкара дика тешал даккха аьттув баьннаб цига дIабахарий. Мехкдас белгалдир укх командировка бахийта дикагIчарна юкъера дикагIбараш хержа хилар.
ТIеххьара ший къамаьл чакхдоаллаш, Баматгире Юнус-Бека аьттув кхайкабир болхачарна, шоашта хьалхашка латта декхар дизза кхоачаш а даь, могаш маьрша уж юха цIенах кхетар ловш.

И. Айюбов

№ 3 (12138), шинара, 15 январь, 2019 шу / вторник, 15 января 2019 года

Добавить комментарий

Ваш e-mail не будет опубликован. Обязательные поля помечены *