Безамца лотабенна сийг

Дукха ха йоацаш арадаьлар Татренаькъан (Гаркхой) Исроапала «Безама гIайре» яха книжка. Дукха ха я къонача йоазонхочо къахьега укх тайпара гуллам вIашагIтохаш, дукхагIдолча даькъе безамо совйоаха дегагIоз а, халонаш а кхайкаеш. Эггара хьалха цун кхоллам байзар йоазонхошта из юкъе варца тайп-тайпарча вIашагIкхетарашка.
«Хьалхара лард гойташ яр, йоазонхо укхох хург хилар а, ер дIахо ваха чам болаш хилар а, керда йоазон белгалонаш йовзаш. Цудухьа укхан тахан аьттув баьннаб ший йоазон никъ хьаллаца а, ший начIал лакхача лагIа тIа даккха а», — иштта белгалваьккхар Исроапал йоазонхой Союза доакъашхочо ЧIимхилгнаькъан Раисас!
«Безама гIайре» аьнна тиллача цIеро гойт шерра йоаржаеш, Исроапала ювца безама белгалонаш: хIаране вахаре хила тарлуш дола сурт делалу цун байта чухь, хIаране дег чу яха уйлаш яшхай цо, сагото а, ираз а долча тайпара гойта гIерташ. Цун дика вIаштIехьадоал байташца болх бе, говзача суртанчо басарашца санна, бу дешаш вIашагIдетташ бола болх.
Безамах дог диллачарна къаьстта кхетаме хургда ер мугIараш:

ДIакхелхаб безам, вахарах воаккхаш,
Мискача дего таьзет диллад,
Хьувзача сино, уйла акха йоаккхаш,
Сийрда са доадаь, дуне кхаьлад.

Кодаме денад ираз, Iаьржделла,
ГIозал юстара узам беш латт.
Са хоза зама, боадо тIакхелла,
Безама дакъа бIархьежаш латт.

Дукха я цун къастарах язъяь байташ. ХIаьта укх байта чу эргача дустарашца цо кIоаргагIа йовзийт вIашагIкъастара хало, халахетара Iоткъам, низ!

Доассаденнад цхьана лийна наькъаш,
Йоассаенна латт безама беш.
Вац, со хьоцара уйла дагакхоабаш,
Дог да хьона цунах дийна теш.

Кхы чIоагIагIа мишта гойтаргья дег чура сагото?! Йолча тайпара ювца а, йоаражае а хар боккха толам ба. Наьха дегашка кхоачаш волча йоазонхочо мара бергбац укх тайпара болх.

Безамца доаца дуне гIайгIане хул,
Лаьттан тIара хозленаш
сагах дIатул.
Чамза хул цун вахар, сердал дIайов,
Бийсан къега седкъа тешам
байча бов.

Тешаме хилара тIахьехам совбувлаш ба хIара мугIа! ДукхагIдола мугIараш уйлангахьа вохийташ, цхьацца сага вахарера гIайгIа лоацаш да. Цудухьа цун кхолламацара дешархочун чам совбувл, хIара оагIув дIа мел лустача хана.

Новрузанаькъан Макка

№ 3 (12138), шинара, 15 январь, 2019 шу / вторник, 15 января 2019 года

Добавить комментарий

Ваш e-mail не будет опубликован. Обязательные поля помечены *