ГIалгIайчен Халкъа Гуллама бIаьстен сесси хьайийлай

ГIалгIай Мехка Парламенте 2019 шера бIаьстен сессе хьалхара эттадола, аргIанара доаца массане а дакъалоацаш дола ховшар дIадихьар. Цу балхага дакъалоацаш бар ГIалгIайчен Правительствоа тхьамада, Йовлой Заьлмах, ГIалгIайчен хоржама комиссе тхьамада Йовлой Мусса, ГIалгIай Мехка гIолла вола федеральни инспектор Смирнов Виталий, Сага бокъо лораерах вола викал Оздой Джамбулат.

Правительства тхьамада бIаьстен сесси йолайирца даькъала бийцар Халкъа Гуллама депутаташ, Iаьдалах бола аьттув а кхайкабир, цул совгIа хьинаре къахьегар ловш ловца баьккхар. Цо белгалдир РФ Паччахьа Владимир Путина хьакхайкадаьча «майски амарашкахьа» белгалдаьха декхараш кхоачаш дар лерхIаме хилар.
«Вайна ма харра, ГIалгIайче дакъа лоацаш хургья масса йолча 12 къаман проекташка. Цу оагIорахьа ГIалгIайчен Правительствос баь белггала болх ба, шоашца доагIаш кийч а даь чIоагIдаь 46 мехка проектай паспорташ а долаш, 2019 шу дIадоладаларца кхоачашдергдолаш тIаийца. ХьалхагIа кхоачаш де дезарий таьрахье чудоагIаш дола Паччахьа белгалдаьхача хаттарех да, мехка бахархой къел дIаяккхари, цар вахара хьал лакхача боараме айдари, иштта дIахои», — аьнна дийцар Йовлой Заьлмаха.
ГIалгIай Мехка парламента тIахьожамах къаман проекташ чакхъяхарах долча хьале къамаьл дир правительство тхьамадас дIахо, Халкъа Гуллама комитеташа шердьа вIашагIкхетараш дIакхахьа деза, профильни министерствоша а ведомствоша а шоаш баьча балхах деча хоамашка ладувгIаргдолаш, аьнна.
Ховшар дIадодаш ГIалгIайчен Халкъа Гуллама депутатай таьрахьа чу боалабир Лаьнанаькъан З.А. Хамхой Б.И. хьалха мукъяьнна хинна мандаш кхачарца. Цу сахьате белгалбир депутаташ малагIча лаьрхIа йолча комитеташка болх беш хургба. Бюджетахи налогехи тIахьожам беш йолча комитета тхьамада хержар Сукенаькъан А.А.
Из доацаш Парламента доакъашхоша даьшхар Халкъа Гуллама лоархIама комисси чIоагIъярахи, иштта Халкъа гуллама депутатай гIулакх белгалдара комисси чIоагIярахи дола хаттараш. Иштта дукхагIа кхачтассарца депутаташа цига хержар ийслагIча кхелан моттига Дунен кхелахо хургвола Хазбенаькъан Къурейш.
Ховшар чакхдоаллаш, юстарадаьккхар цхьакха хаттар – Халкъа Гуллама тхьамадан гIонча волча Кхоартой Якъуба шийна тIера декхараш Iодохкар. Цхьана болх беча юкъа къахьегарах депутаташта баркал а аьнна, дIахо йодача хана цар аьттув балар кхайкадир Якъуба. ДIахо цун кога метта саг хоржача къайлагIа даьча хоржамашка хьалхаваьлар Сукенаькъан Асхьаб.
Керда хержача вице-спикера баркал аьлар депутаташта шийх тийша уж декхараш шийна тIадохкаш кхач тассарах, хIаьта дIахо йодача хана къаман гIулакх хьалха лоаттадеш халкъа духьа депутаташа къахьегаргхиларах тийша ва из.

И. Айюбов

 

№ 4-5 (12139-140), ера, 17 январь, 2019 шу / четверг, 17 января 2019 года

Добавить комментарий

Ваш e-mail не будет опубликован. Обязательные поля помечены *