ГIалгIай мехкахбаьха 75 шу дизар дувцаш вIашагIкхетар дIадихьар ГIалгIайчен Правительстве

ГIалгIайчен Правительства тхьамадас кулгал деш вIашагIкхетар дIадихьар 1944 шера? шоай мехках а баьха Казахстанеи Юкъерча Азее гIалгIай Iобахийта 75 шу дизар дувцаш. Цига дийцар, мехка гIолла цу таьрахьах хоттаденна вIашагIкхетараш дIакхахьа дезаш хилар а, малагIча боараме уж хила деза а. Цу гIулакха вIашагIъеллача комитета доакъашхоша белгалйир цу таьзета таьрахьа хетаяьча хана чухьа бергболча балха план.
Февраль бетта 19 дийнахьа ГIалгIай Iилман-тохкама институте дIахьоргйолаш я «75 лет депортации ингушского народа» аьнна цIи тIатеха йола Халкъаштаюкъера Iилман-балха конференци. ХIаьта къам мехкахдаьккхача 23 дийнахьа Наьсарен Даглоацама а Сийлен а мемориале митинг дIахьоргйолаш я, мехкахбаьхараш а, мохк лорабеш лаьттараш а дагабохаш.
Миннаца кулгалхочо Яндакъонгий Муслима яхачох, мехкарча боккхийча нахаца вIашагIкхетараш дIакхохьргда царна тускарашка сурсат декъаш а, мовлаташ дешаш а. Цул совгIа мехках даьха ха дагайоагIаш болча нахага цох дар а дувцийтаргда кхувшбоагIарашта из ха йицлургйоацаш. ХIаьта февраль бетта 1 дийнахьа денз мехкарча дешара учрежденешка вIашагIкхетараш дIакхохьаргда вай къамо бIарчча 13 шера лайна хало, бала, царга хинна къиза а гIоза а ханаш ювцаш, кхувш боагIача дешархошта из тархьар дицлургдоацаш.
Иштта НТРК «ГIалгIайче» гIолла кийчдеш документально-художественни фильм да гIалгIай мехкахбахар дувцаш. Цул совгIа боккхийча нахага шоашта цу ханах дагадоагIар дувцийташ дIахьош ногIал а да «Воспоминание» яхаш. Из доацаш кхы а массехк передачаш хургья цу таьрахьа хетаяь.
Ший аргIах Культура министра Базоркин Микаила хоам бир цу хьаькъе дIадахьа лаьрхIа 60 совгIа вIашагIкхетараш да шоай, аьнна. Царех лерхIамегIдар да «Я очевидец» яха гуллам арадаккхар, иштта тематически выставка а хургья «Черный февраль» яхаш, мехкарча паччахьалкхен музеешка. Иштта спектаклаш а хургья, цу таьрахьах хоам беш вIашагIкхетараш а дIакхохьаргда мехка масса йолча культура цIеношка.
Белгалде деза, къам мехках даьккха 75 шу дизара хетадаь «Поезд памяти» яхаш ногIал хилар а. Из да 1944 шера гIалгIай сибаре бигача новкъа гIолла гIалгIай Мехкара делигаци Казахстанерча гIалгIай диаспораца вIашагIкхетаргйолаш хилар.
«Вай керттера лаьца никъ ба, кхы цу тайпара хIама нийслургдоацаш из таьзета ха дагайоагIаш хилар. Вайна дагадоагIа Сталина вай къама тIаоттадаь Iазап, бакъда, иштта халача хана вай паччахьалкхен къамаша вай оагIо хьаллацар а дицденнадац вайна», — аьнна белгалдир Йовлой Заьлмаха.
Правительство тхьамада декхар тIадиллар, цIихеза бола сибаре текха вай къаман наьха список оттае, цар цIерагIа ГIалгIай мехка наькъаш хиларца цар цIераш яха юсаргйолаш, аьнна.
Масса йолча мехка районашка из ха дагайохийташ, цох бола хоам мехка бахархошка беш вIашагIкхетараш а дIакхахьа, къам мехкахдаьккха 75 шу диза хилар белгалдеш баннераш а овттаде аьнна, кхайкарал дир.
Наькъа болхаш а, Iоа Iокхаьчача а, юха мехка цIабаьхкача а сибаре текха мел байнарех Дала къахетам болба, Дала гешт долда царна.

Матенаькъан Илез

№ 4-5 (12139-140), ера, 17 январь, 2019 шу / четверг, 17 января 2019 года

Добавить комментарий

Ваш e-mail не будет опубликован. Обязательные поля помечены *