Лар йоацаш Египте байнача гIалгIай дешархой лар тахкар

ГIалгIайчен Правительства тхьамадан хьалхара гIонча, Россе Федераце массаза вола ГIалгIайчен викал волча ЦIечой Iалихана Мехкдаьца Евкуранаькъан Баматгире Юнус-Бекаца хиннача вIашагIкхетаре дийцар, Каира бусалба Iилман университете деша багIа ГIалгIай мехкара дешархой Египте боврах долча гIулакхах.

Долча хоамех, де доацаш байнараш Египте бокъолораерах йолча органаша дIалийца хиннаб. ДIадахача шера декабрь бетта 27 дийнахьа цу хаттара тIагIолла ГIалгIайчен кхерамзлен совете тIабийха хиннабар лар йоацаш байнарий дай-ноаной. Цар хоам баьбар, шоай дезалца дукха хана денз бувзаме бовла аьттув балац шоай, цудухьа хиннар фуд ца ховш чIоагIа сагота ба шоаш, аьнна.
ГIалгIайчен Мехкадас тIадиларца, январь бетта 11 дийнахьа Россе волча Египта посол волча Ихабом Ахмед Талаат Насромаца вIашагIкхетар хиннадар ЦIечой Iалихана, хиннар фуд тахка а, байнараш хьалаха гIодар а дехар духьа.
«Египта посола хинначох хоам бир вайга. Карарча хана, вай кагирхой лохаш, бола моттиг мичахьа я тохкаш Египте гIолла дIахьош балхаш да Iарбий мехка оагIорахьареи, российский консульстваши. Иштта тохкаш да, уж дIалувцара бахьан фуд а. Эггар хьалха тийша хила деза вай, воай мехкахой дийна а маьрша а хилар. Догдоах, касташха дар-доацар хьагуча далар а, вай кагий нах шоай мехка цIабахкар а», — аьнна дийцар вице-премьера.
Бусалба динах долча хаттарашкахьа ший гIонча а дагвалархо а волча Дзоврнаькъан Мухьмада тIадиллар Мехкдас Баматгире Юнус-Бека, хиннача гIулакха тIагIолла, мехкарча телевидене гIолла къамаьл де, доазол арахьа деша болхаш хилча доазув хоададара бокъонаш лораяр лерхIаме хIама долгах нах дIакхетабеш, аьнна,
«Цул совгIа, кастлуш мехка лаьрххIа юкъарче вIашагIйолла еза, доазол арахьа бусалба Iилман дешар Iомаде чам болаш дIаухаш болча кагийча наха хиланза даргдоацар ховргдолаш, царна цу хаттара тIагIолла новкъостал хилийта консультаци ергйолаш, иштта бокъолораерах йолча органашка гIолла чакхбоахаргболаш а, — аьнна белгалдир ГIалгIайчен Мехкдас.
Из доацаш, Евкуранаькъан Юнус-Бека Дзоврнаькъан Мухьмада декхар тIадиллар, профильни ведомствашца цхьана февраль бутт бовш кийча хургйолаш, мехкал арахьа Россе а кхычахьа а деша багIараш чубоагIаш база вIашагIйолла еза, вай студенташ дешара тIакхера а, оамала а миштаб дикагIа ховргдолаш. Цул совгIа ишта эшаш хIама хуле доагIача боараме кийча долаш, хьалага хьожаргдолаш.

И. Айюбов

№ 4-5 (12139-140), ера, 17 январь, 2019 шу / четверг, 17 января 2019 года

Добавить комментарий

Ваш e-mail не будет опубликован. Обязательные поля помечены *