Поэта хьалхара книжка

Укх шера нийса 50 шу дуз, гIалгIай халкъа поэта Гагиев Гирихана эггара хьалхара книжка арадаьлча денз. «Тополя в цвету» аьнна цIи тиллаяр цох байтанча. Из эрсий меттала дар. Ала деза, юххьанцара ший йоазош, наьна меттала а ца деш, цо эрсий меттала деш хиннилга.

Цунна дика карахдоалаш а хиннад уж кхолла, хIана аьлча, цо ше ма аллара, хьехархо хиннача Макарова Галина Ивановнас эрсий мотт дика Iомабаь хиннаб хургволча поэта. Цу заман чухь а тIехьагIа а гIалгIай кицай кIийлен тIа цо кхелла лоаца стихотворенеш йийшай аз. Царех цхьаяраш геттара еза а еннай. Масала, вай къаман да «ВорхI тIакхийтача а яьккхаяц йоацачунгара хачи». Гагиевс цох яьяр укх тайпара зIамига байт:

«И семеро джигитов
Не отняли штанов
У одного джигита,
Который без штанов».

Лакхе хьоахадаьча цу зIамигача книжкагара дIаволавенна, ший мехка а цул арахьа а цIихеза поэт хиннавар Гагиевх. Дукха дика йоазош даьдар цо тайп-тайпарча шерашка. Уж юкъедахадар «Маьлха кIала», «Керттердар», «Ловца», «Хоза моза», «ДогIа халхадувл» яхача а кхыча а книжкашта. Цар чулоацамах хов вайна Гагиев Гирихан нах дукха безаш, царцара гаргалол лехаш, ший мехка сий деш, из лакха лоаттадеш саг хиннилга. Сона геттара гарга вар, вовзар поэт, студент волаш, Шолжа-ГIалий тIа дешаш айса яьккхача хана денз. Цул тIехьагIа «СелаIад» яхача берий журнала редакце цхьан кабинете къахьийгар оаха массехк шера. Дахаш а цхьан шахьар тIа Магасе дар тхо, вIаший дукха гаьна доацаш.
Цун хьалхарча книжкан ах бIаь шу дузача хана, аз юха а доаккхал ду гIорваьнна поэт сайна вайза хиларах. Укх деношка, Магасерча из ваьхача цIенна юхегIолла тIехвоалаш, сона дайра цу тIа хьалтеха доалла улг. Цу чу поэт ваьха хиларах хоам бора цо. Вешта аьлча, Гагиев Гирихан вицвеннавац наха.

С. Арчаков

№ 4-5 (12139-140), ера, 17 январь, 2019 шу / четверг, 17 января 2019 года

Добавить комментарий

Ваш e-mail не будет опубликован. Обязательные поля помечены *