1888 махбара акт оттаяьй

Шу чакхдаларца цу юкъа хиннача хувцамашка хьож вай. Царех дукхагIа сакъердалуш дар да саг яхар-яр, керда саг малх валар. Мел хиннад уж вай мехка чакхдаьннача 2018 шера? Цу хаттара а массехк кхыча хаттара а жоп луш я, укх деношка ГIалгIачен ЗАГСо дIадахача шера шоаш баьча белхах я чаккхе.

Царех лаьца хоам бир тхога ЗАГСа керттера говзанча йолча Джандигова Залинас. Цо ма аллара хIара шер ГIалгIайчен ЗАГСий доакъошка 40 эзар гаргга саг вода шоай вахаре хинна хувцам дIаяьзбар а, цун тешал а дезаш. Цул совгIа 8 эзар совгIа запрос йоагIа бахача нахагара а организацешкара а. Шера 13 эзар граждански хьалах йолча акташта регистраци ю, кхыдола юридически лерхIаме гIулакхаш а ду юкъара хьалаьцача — 18 эзар.
Дерригаш а 2018 шера ЗАГСо 13502 граждански хьалах йола акт оттаяьй. Царех дукха яраш керда саг малхвалара – 7967. ДIадахача шера даьча берашта юкъе 4078 кIаьнк ва, 3889 йIиг я. Шола даь 72 моттиг хиннай. Кхолха даь бераш 1 дезале хиннад.
ДукхагIа техкаш йола маIача наьха цIераш хьалхарча шера хиннараш я: Мухьаммад (399), ИбрахIим (116), Iумар (114), дIахо – Халид (112), АбдуллахI (109). Дукха тийхка кхалнаьха цIераш: Хадиджа (181), Iаиша (180), Амина (159), Сафия (149), Хьава (123).
2018 шера хIанзалца хиннайоаца цIераш а гучьяннай вай мехка. Уж я: Тараму, Ярич, Эсра, Тасним, Джасима.
Из доацаш, дIадахача шера ЗАГса говзанчаша 1888 махбара акт оттаяьй. КIезига мах бухамарах яраш а яц – 399. Байна дIакхалхачара таьрахь – 1622 да (Дала гешт долда царна). 99 моттиг хиннай берашта доал отташ.
Иштта теркам тIабодаш да 351 сага шоай цIи хийца хилар.
Вай ювцача юкъа шера ЗАГСа болхлош 18607 юридически лоархIаме дола гIулакхаш даьд. Хьадувцачох вай мехка ЗАГСо тIехдика кхоачашдаьд шийна Россе юстици министерствос тIадахка декхараш.
ГIалгIайчен ЗАГСо болх мел беча шерашка 744 гражданский хьалах йола акт язьяьй.
Джандигова Залинас баьча хоамах, ЗАГСа органаш 100 шера лораду шоай китабашкахь наьха вахарера массайолча этапех дола йозонаш. Паччахьалкхен архивашка даим хургья уж.
Таханарча дийнахьа бахача наха ха дезаш, тIехьарча хана ЗАГСо беча балха хинна хувцамаш малагIаш да, аьнна хаттар делар оаха ГIалгIачен ЗАГСа кулгалхочо БIархой Мадинайга. Цо ма аллара, октябрь бетта денз хьа организаце болх бу кердача программаца. Цун цIи я граждански хьали йозонех йола юкъара государственни реестр (Единый паччахьалкхен реестр записей актов гражданского состояния). Из налогови служба программ я, Цунга хьажжа из урхале я цу кердача программа оператор.
Наха малагIа аьттув хул цох? Россе юкъара реестр из хиларга хьажжа вай паччахьалкхен моллагIча регионе саг нийслой а цун аьттув ба, укхаза ше даьккха каьхат дейна моттиг хуле, из кердадаккхийта. Массала бери метрика ейний ГIалгIайчен доазув тIа а доацаш – Дальний Востоке. Из яьккха юха цIава ца везаш Россе паччахьалкхен юкъара база из хиларагI цигарча ЗАГСе дIавахача хьалургда цун из каьхат.

Бохтарнаькъан ХIарон

№ 4-5 (12139-140), ера, 17 январь, 2019 шу / четверг, 17 января 2019 года

Добавить комментарий

Ваш e-mail не будет опубликован. Обязательные поля помечены *