2019 шера сентябрь бетта хургдолча хоржамашта кийчо яр

ГIалгIайчен Мехкдас Евкурнаькъан Баматгире Юнус-Бека балха вIашагIкхетар дIадихьар, ГIалгIай Мехка дIаязъяь къахьегаш йолча политически партей викалашца. Дашха айдаь хаттараш дар партей ража балхаца дувзаденна гIулакхи, мехка латташ дола политически хьал дашхари, иштта 2019 шера партешца цхьана бергболча балха гIулакхи. ВIашагIкхетаре дакъалоацаш бар ГIалгIай правительства тхьамада Йовлой Заьлмахи, политически партей мехка отделеней кулгалхойи.

ВIашагIкхетар доладеш Баматгире Юнус-Бека белгалдир укх шера муниципальни хоржамаш хургхилари, цига хьинаре къахьега дезаш хилари: «Бехктокхаме гIулакх да из, вай мехка бахархоша дIахо додача диъ шера вай мехка хьал мишта хургда къоастадеш. Цар къоастадергда муниципальни образованейи, берригача мехкаи общественно-политически а, юкъара-экономически а хьал дегIадар. Цудухьа вай массадараш дагадоагIаш хила деза вай бIорахочун балха декхар. Беррига низ дIатIа а бахийта мехка хоржамаш тIехдика чакхдаргдолча боараме къахьега деза вай. Партей юкъарченашка из болх хIанзе а дIаболабе беза», — аьлар Баматгире Юнус-Бека.
Партей мехкарча отделеней кулгалхоша баьча хоамах, карарча хана дIахьош хьинаре болх ба 2019 шера сентябрь бетта хургдолча хоржамашта кийчлуш. Масса районашкарча, шахьарашкарча, юрташкарча депутаташца дIакхохьаш вIашагIкхетараш да. Хьинаре къахьегаш партей юкъара чуэцара моттигаш а я. Мехка бахархой тIаэцаш царга ладувгIаш, царца къамаьлаш деш ба, муниципальни а, Халкъа Гуллама а депутаташ.
Карарча хана «Справедливая Россия» яхача парте мехка отделене чувоагIаш 1249 саг ва, аьнна, хьоадир цу парте кулгалхочо Йовлой Урусхана. Цо яхачох, массайолча 8 муниципальни кхолларашка лерттIа болх беш хIара 8 отделени я, хIаьта 154 первични отделени а я.
«Единая Россия» яхача парте кулгалхочо Мартазананаькъан Беслана баьча хоамах карарча хана вIашагIъелла 136 первични отделени я 9 моттигерча отделенешка. Царшка учете латташ 9 127 саг ва. Хоржамхоех 4% совгIа я из.
Мехкда Баматгире Юнус-Бек тийша ва, лерттIа доагIача боараме хоржамаш чакхдаргдолаш ГIалгIайчен хоржама комиссе Iалашо еш хьинаре къахьегарг хиларах.
Цул совгIа цо аьлар, политически партей викалаш дукхагIа дакъалоацаш хила беза мехка бахархой хьал тоадарах долча гIулакхашкахьа, аьнна.

И. Айюбов

№ 6 (12141), шоатта, 19 январь, 2019 шу / суббота, 19 января 2019 года

Добавить комментарий

Ваш e-mail не будет опубликован. Обязательные поля помечены *