Соче дIахьоргйолча инвестицен форуме 7 барт язбергболаш ба ГIалгIайчено

Февраль бетта 14-15 деношка Соче дIахьоргйолча Россе инвестицен форуме ворхI барт язбе уйла йолаш я ГIалгIайче. Цох бола хоам бир ГIалгIайчен экономикан министра ТIоаршхой Умалата, Мехкдас тхьамадал а деш дIадихьача аргIанарча вIашагIкхетаре.

Умалата яхачох, хIанзле белаглья я цига гIоргболча нахах латта тоаба. Иштта инвесторашца дувцаш да барт язбара гIулакхаш. Кемеровски областаца барт язбе лерхI ГIалгIайчено, махбара-экономическии, Iилман-техническии, культураи даькъе. ООО «ЗАС РИАЛ» яхача юкъарчено ГIалгIай Мехка алюминиеви лоаладарий завод е лерхI, шера 10 эзар тонн кхоачам Iалашбергболаш, хIаьта ООО «Бест-Бренд» яхача юкъарченца берашта лаьрхIа санитарно-гигиенически кхоачам Iалашбергболаш дувцаргда. ООО «Группа «Артис» яхача юкъарчено массехк гIат йола цIенош доттаргдолаш да. Иштта ООО «ЛПК «Мужичи» мехка доазон тIа хьу цхьалхайоаккхаш йола комбинат хьалъергйолаш а язбергба барт.

Форума гойтама стенде овттабе лерхI АО «Корпорация развития Северного Кавказа» яхача даькъе ГIалгIай Мехкара юртбоахама а шурий а кхоачам, лоаман модз, шоколад. ЖIайраха доазон лоамашка хьахулаш йола баьцаш теха кийчдаь доаккхийча гIаьнех дола чай. Цул совгIа, ГIалгIайчено инвесторашта гойтаргба дулхах баь кхоачам, цIена молаш дола хий, иштта ГIалгIайчен доазон тIа хьаеш йолча сувенирай кхоачам.
Баматгире Юнус-Бека белгалдир, хьалха дIаяхача ханашкахьа ГIалгIайчено форуме баь хинна барт мишта кхоачаш баьб а, дIахо из гIулакх мишта латта а тахка дезаш хилар: «Инвесторашта ма хетта моттигаш Iалаш яьй вай. ГIалгIай Мехка геттара пайдане хургйолча тайпара хила еза проекташ. Баьб алийтар духьа а доацаш, къахьегаш а, шийгахьа мехка пайда хьабоаллаш а хила еза проекташ. Хьалха баьча бартех фу хиннад а, болх мишта дIабода а хьажа, инвестораша шоашта тIаийца декхараш кхоачашдой а тахка. Иштта льготашца пайда эцаш болча предпринимателашта а терко е», — аьнна декхараш тIадахкар Мехкдас ТIоаршхой Умалата.
Ала деза, 2018 шера «Inc» яхача тептаро баьча хоамах, керда йолаеча бизнеса, дикагIйолча пхеннех цаI я ГIалгIайче, аьнна.

Матенаькъан Илез

№ 7 (12142), шинара, 22 январь, 2019 шу / вторник, 22 января 2019 года

Добавить комментарий

Ваш e-mail не будет опубликован. Обязательные поля помечены *