Дешархойи, унахойи хьашташ кхоачашдергдола 46 машин хьакхаьчай ГIалгIайченга

Россе правительствос хьахьожайирца юкъара дешара школашта лаьрхIа 28 автобуси, унахцIено Iалашъяра 18 скорая помощь оала машини кхаьчай ГIалгIайченга. Керда йоалаяьча машиний дIоагIаш, уж дIакхоачачарна декъаш хилар Къилбаседа Кавказа Федеральни округе Россе Федерацен паччахьа йизза бокъо йола викал Матовников Александри, ГIалгIайчен Мехкда Евкурнаькъан Юнус-Беки.

Тай-толакха хьисапе машинаш дIаекъаш дIадихьача вIашагIкхетаре Матовников Александра аьлар, таханар ди ГIалгIай Мехка чIоагIа лерхIаме а, шийгахьа кхоачам болаш а да, аьнна: «ХIанзза Назранерча мехка клинически больнице дега-пхьаний юкъарче хьайийлача а хинна доагIа тхо. Цига болаш ба хала эттIадараш де эшаш бола кхоачам. ХIаьта хIанз дIахо цу тайпара дегагIоз йолаш цхьаькха болх кхоачашбергба вай».
Александра белгалдир, кердача школан автобусаша гаьнара деша хьаухаш долча берашта кхерамзле Iалашйирца дикагIа деша аьттув луш хилар. ХIанзчул тIехьагIа аттеи, кхерамзеи, сихеи хургда берий деша дIакхачар. Массехк скорая помощь яха машинаш дIахьожаергйолаш я мехка лоаман юрташка, цигара унахой мехка юкъарча дарбанчешка тIабоалабе а, царна эша дарба де а аьттув хургболаш.
Паччахьа йизза бокъо йолча викала яхачох, уж уйла йолаш ба ГIалгIайче кастуш юхе йиса скорая помощь оала машенаш цIенагIчарца дIахувца. «Иштта 50% техника ГIалгIай Мехка а, огруга кхыча мехкашта а эшам болаш я. КIезиг-кIезига къовлаш из хаттар дIакъовларгда вай», — аьлар Александра. Иштта керда йоалаяь скорая помощь яха машинаш хьожаергйолаш я ЖIайраха доазон тIа. Ала деза из ГIалгIайчен гаьнагIйола лоаман район я, аьнна.
Мехка совгIаташ декъача Мехкдас Баматгире Юнус-Бека белгалдир, мехкий кулгалхошта хьалхаленца долчарех да, унахцIенони дешараи материально-технически хьал эргадаккхарах дола хаттар. Цу оагIорахьа федеральни кулгалхоша кхоачашдеш дола, дара кепа гIулакх ГIалгIйчено лакха мах беш лоархIаш да, аьнна.
«Тахан вай дIадекъаш да, мехка школашка дIа-хьа хьожаергйолча 28 автобусаи, унахцIенон дарба дара дIа-хьа хьожаергйолча 18 скорая помощь даькъе йолча машинаи дIоагIаш. Из еррига а автотранспорт вайна хьахьожаяьй федеральни правительствос. Вайна доккха гIо да из, наьха могашал Iалашъяра даькъе болча къахьегамхой болх тоабараи, школашта бераш гаьнарча моттигашкара тIакхувладезаш дола хаттар юстарадаккхараи», — аьнна къоагадаь белгалдир Евкурнаькъан Юнус-Бека. Цул совгIа, керттерча лораштеи, школай кулгалхоштеи декхараш тIадахкарца хьалхадаьккхар цо, боагIача боараме унахошта могашал Iалашъяра даькъеи, берашта дешар Iалашдара даькъеи къахьегийта деза цу транспорташца, аьнна.
Иштта, дIадахача тIехьарча кхаь шера Россе правительствос ГIалгIайченна еннаяр 10 скорая помощь оалаи, шиъ реанимобиль оалаи машенаш. Школашта лаьрхIа 24 микроавтобуси, ийс цIено Iалашъеш йола автотранспорти а еннаяр. Иштта цхьаъ реанимобильи класса С оалаш йола, бархI класса В оалаш йола газелаши. Паччахьалкхено еш йола терко ди тIехьа къа а хьегаш нийсача оагIора ерзайой мехка хьал лакхача боараме хувцалургда, аьнна хеташ ба мехка кулгалхой. Доккха совгIат да из къаьстта бераштеи, унахоштеи.

Матенаькъан Илез

№ 8-9 (12143-144), ера, 24 январь, 2019 шу / четверг, 24 января 2019 года

Добавить комментарий

Ваш e-mail не будет опубликован. Обязательные поля помечены *