«СмартИНГ» — берий эзди кхоане

Укх деношка «СмартИНГ» яхача школе берий кхоллама хетадаь вIашагIкхетар дIадихьар, дукха бераш а, ноаной а, хьаьший а гулбаь. «СмартИНГ» яха ментальни арифметика хьеха школа хьа а йийла болх бе йолаеннача хана денз дукха бераш тIаозаш я. ХIара бера начIал довзийташ, цар говзал лакхъеш болх бу цу гIулакха хьалха латтачар. Гаденаькъан Хьава я цу тайпара берашцара болх дIахьош, вай кхоаненна ментальни арифметика кIоаргагIа йовзийташ а, цунца дувзаденна кхыдола наькъаш хьаделлаш а.

Цун цу тайпара школа хьаелла уйла совъяьлар 2016 шера «Учитель года» яхача яхьашка дакъа лаьцачул тIехьагIа. Из яха хилар Самаре, цун цига аьттув баьлар ший хьехархочун говзал лакхача лагIа тIа яккха а, кхыча хьехархошца дагаяла а, керда наькъаш хьаделлаш долча берашцарча балхашкахьа.
— Цхьан тайпара бола хьехама никъ кердача уйлашца, наькъашца совбаккхар керда белгало юкъейоалаяр, тха декхар да, — йоах Гаденаькъан Хьавас, ший балха декхараш довзийташ.
— Берий сакхетам совбоаккхаш бола никъ къаьста хила беза, уйла яйтаргахьа низ тIабохийташ, цар начIал чIоагIдеш. Ментальни арифметика дагалоацам дIачIоагIбеш я: дагахьа дагарде бераш Iомадеш, оаха уйла сихагIа е Iомабу, мотт шаьрбе а аьттув ба цар тхоца, нагахьа санна метта говзал караерзае безам болаш уж бале.
Хьава дукха дийша я, ший дешара ха цо хетаяьй берашцара бувзам лелабара а, цар сакхетам Iомабара а. 2002 шера цо яьккхар ГIалгIай паччахьалкхен университет ингалсийи немцийи метташ Iомадеш. 2006 шера Хьава дийша яьлар Московски технологически университете, менеджер-управленец яхача говзалгахьа.
Цо тахан лелабу болх дукхача наха къоабалбеш ба. Берий ноаной раьза болга гойтар берригаш цхьана вIашагIкхетаре гулбаларо. Деррига шоай гIулакхаш а дита, уж баьхкабар шоай дезалий самукъадаккха а, цар оагIув хьаллаца а. Берашта салоIама программа яхьаш баьхка аниматораш а бар цига. Цар тайп-тайпара ловзараш дIадихьар зIамигачар дегашка дегагIоз кхоллаш. Кертера дакъа дар берашта дипломаш а, совгIаташ а декъар, декабрь бетта дIайихьа хиннача яхьашка дакъалаьцарий юкъара мах беш. Берий дегагIоз гуш яр: хIаравар раьза вар ший аьттув балара, «СмартИНГ» яхача ишкола цIай дездеш, дакъалаца.
Ер мо дола толамаш дукхагIа хилда «СмартИНГ» яхача дешарчен вахаре. Вай берий начIал довргдац, Хьава мо бола хьехархой хьалха мел латтача хана.

Новрузнаькъан Макка

№ 8-9 (12143-144), ера, 24 январь, 2019 шу / четверг, 24 января 2019 года

Добавить комментарий

Ваш e-mail не будет опубликован. Обязательные поля помечены *