Мехка бокъо лораеш хьийга къа дайнадац

ГIалгIайчен Мехкдас Евкурнаькъан Баматгире Юнус-Бека, РФ генпрокуратура гIонча волча Сыдоруков Иванаца цхьана дакъалаьцар шердаь дIадихьача мехка прокуратура органий вIашагIкхетаре. Цига айдаь дийца хаттар дар дIадахача шера баьча балха даькъеи, хIанз додаш долча шера хьалхарча ахшера мехка бокъо Iалашъярцеи дувзаденна.

Иштта ховшарга дакъа лоацаш бар ГIалгIай Мехка гIолла вола керттера федеральни инспектор Ошноков Рашид, ГIалгIайчен лакхехьарча кхела тхьамада Фаьргнаькъан ИбрахIим, ГIалгIай Мехка чурча гIулакхий министр Кава Дмитрий, ГIалгIай мехка гIолла йолча Россе СУ СК хьакима декхараш кхоачаш деш вола Белхарой Iусман, иштта мехка прокуратура болхлойи.
Керттера доклад ешаш 2018 шера мехка прокурорски надзора бокъо лорайирах баьча балхаца дувзаденна хаттар айдир Васильченко Андрейс. Цо яхачох, прокуратура органаша хьабаьр боккха болх ба. Царна гучадаьннад бокъо лораярах долча даькъе 2 эзар закон дохадеш. «Прокурораша баьча балхах административни аргIах бехктокхаме эза 4 эзар саг ва, хIаьта 43 хьадаь уголовни гIулакх а да», — аьнна хоам бир прокурора.
Васильченко Андрейс яхачох мехка болх хьабаьчарна дIа ца луш диса алапи дIалургдолаш баьча балхах хьагучадаьннар 121 млн сом ахча дар. Цул совгIа паччахьалкхени муниципальнии бокъо йохаярахи, коррупцена дохьал баьча балхахи 1,3 бокъо толхаяр хьагучадаьккхад. Уж дIадахара хьаяь 157 дохьале я, 24 искови заявлени я, 169 оттам а ба. Уж дашхарца 342 саг бехктокхаме эзав. Иштта прокуратура органаша мехка гIолла бокъо толхаяр тохкаш баьча балхах 7 эзар гIулакх гучадаьннад, царех 252 учете а оттадаьд.
Гулбеннарашта хьалхашка къамаьл деш ГIалгIайчен Мехкдас белгалдир, дIадаха шу атта хиннадац аьнна. Юкъара-экономическии, юкъара-политическии хаттарашкахьа духьаленаш а, халонаш а хиннай. «Цунга хьежжа а доацаш, хьалха дIадахача шерашка санна дIахо а дегIаденад мехка хьал. Массадолча экономика а, социальни а оагIорахьа мехка гIулакх алсамдоалаш да. Мехкда хиларга хьежжа са кхы ер ма дий ала цIенхашта хIама дац, прокуратура органех бехк баккха. Цул совгIа, вай хийцца ала йиш йолаш да, прокуратурас кхоачам болаш ший болх дIабихьаб, аьнна», — белгалдир Баматгире Юнус-Бека ший къамаьле.

И. Айюбов

№ 13 (12148), ера, 31 январь, 2019 шу / четверг, 31 января 2019 года

Добавить комментарий

Ваш e-mail не будет опубликован. Обязательные поля помечены *