Мехка экономика дегIайоалаеш

ГIалгIайчен Мехкдас кулгал а деш ГIалгIай Мехкара яхача тоабано Москве Швейцарски посольстве мехка инвестиционни кхоачам гойтар. Доазол арахьарча инвесторашка дийцар бизнес хьаллоацаш деш долча федеральни а мехка а гIонах лаьца. АПК даькъе йолча инвестпроекта викалаша туризмах а, промышленностех а, иштта ГIалгIай Мехкарча сурсатех – лоаман моз, Iажаш, шурах хьадеш долча даарех дийцар.

ГIалгIай Мехкара яхача тоабан чубоагIаш бар сенатораш Хамченаькъан Билани, Чиленаькъан Мусаи, Паччахьалкен дума депутат Харсенаькъан Iалихани, Экономика дегIайолаерах йолча министерства кулгалхо ТIоаршхой Умалати, ГIалгIайчен инвестици дегIайоалаерах йолча агентства кулгалхо Налгнаькъан Рамилаи, иштта мехка АПК даькъе йолча йоккхийча предприятей кулгалхойи.
«ДIадахача шера тхо ГIалгIай Мехка даьхкача хана вIаший бе тарлуш болча барта хьаькъе айдаь хаттараш дар вай, къаьстта отходехи туризмахи лаьца. Тахан оаха лаьрхIад Россе болх беш къахьегаш йолча Швецарски компанешта ГIалгIайченга ма ярра дикагIа ше хьайовзийта, дIахо эшаш дола гIулакх леладе бувзам чIоагIбергболаш», — аьнна белгалдир Швейцарски посола.
Цун дош хьаллоацаш дIахо къамаьл даьча Баматгире Юнус-Бека белгал ма даккхара, таханарча дийнахьа социально-экономически хьале Россе геттара дегIабоаш болча итт мехка юкъе йоагIаш я ГIалгIайче. «Тхацига хIанзле гучаяьннай европейски проекташца яхье ювлаш йола гIишлош. Уж йоккхий бешамаш я, промышленни кхоачам ба. Вахара гIишлон балхашцеи, туризмацеи уж оагIонаш тахан хьалха я тха мохк дегIабара. Цудухьа цу оагIорахьа бувзам лелабе чам бар тха тхоай швейцарский новкъосташца», — аьнна белгалдир Мехкдас Баматгире Юнус-Бека.
Шуца гIулакх леладе чам хиларал совгIа, базар лелае а чам ба тха, аьнна дийцар Баматгире Юнус-Бека. ХIаьта ГIалгIайче кийча я цу мехка моззи, соми, хаьси, дулхи, молаш дола цIена хийи, иштта энергилораеш йола лампаши, кIала кхоачами, кIала радиатораши Iалашъе.
Мехкдас иштта хоам бир царга, царна эшаш дола лаьтта дакъаши, къахьега мара ца дезаш кийча моттигаши Iалашъе кийча я ГIалгIайче, аьнна. «Мехка болаш ба масса оагIорахьа бизнеса гIо деш бола кхоачам, инвестициционни Iоадар лора а деш къахьега мара ца дезаш. Кхы цу тIа дикка дегIа денад логистика яха хIама а, миччахьа мухь дIа-хьа бахьа аьттув болаш», — белгалдир Евкурнаькъан Юнус-Бека.
ВIашагIкхетаре гулбенначарна ГIалгIайче дикагIа дIайовзийташ ролик гойтар вай мехкахоша. Керттерча докладаца лаьрххIа йистхилар ГIалгIайчен экономика дегIайоалаерах вола министр ТIоаршхой Умалат. Цо аьлар хIара дIайовзийта уйла йола проект, хIанзле ший инвестор волаш я, аьнна. Мехкахоша хьалххе а дIаяхьийта хиннай посольстве проекташ, царца хьежа, болх бе швейцарски инвестораш лохаш.
«Швейцарски инвесторашта хьалхайилла аьттув болаш да тхо тхоай проект «Сад-Гигант Ингушетия». Цига хьахулаш хьачаш, гIамагIаш, Iажаш ба, шера проекта низаца 60 эзар тонн сом хьалуш. Иштта теплични комплекс я 30 га боарам болаш, дулх дIа-хьа нийсдеш йола комбинат, мола хий чудотташ йола завод «Аква Триумф». ХIаьта туризма даькъе аьлча, массахана болх беш йолча туристско-рекреационни гIишло «Армхи» вIаштIехьаяьккха уйла йолаш йоккхий проекташ я: салаIа цIенош, отелаш хьаерцеи, лоаман-когсоалоза никъи, муша никъи, шана дворец, гольф-клуб ерцеи. Иштта кхы а дукха проекташ я хIанзле салоIача наха Iалашъеш», — аьнна дийцар министра.
Умалата къамаьл чакхдаьлча, ГIалгIайченца цIенхашта чам болаш бизнес-къамаьл дир гулбеннараша. Массехк швейцарски инвестораша дакъалаца чам ба шоай аьлар министра хьоаха мел даьча гIулакхашкахьа а медицина оагIорахьа а ГIалгIай Мехкаца бувзам лелабеш болх бе.
ДIахохьоргболча балхацара бувзам чIоагIбе а, массайола оагIув тахка а гурахьа дувла аьнна, ГIалгIай Мехка дIабийхар Мехкдас Баматгире Юнус-Бека Швейцарера хьаьший. «Тхо санна лоамарой ба швейцарцаш а, шун а да тха санна хьаьша лархIар лакха боарам болаш. Цудухьа, гурахьа тхоай мехка укх тайпара вIашагIкхетар вIаштIехьадоаккхаргда оаха Швейцарерча хьаьшашта», — аьлар Евкуранаькъан Баматгире Юнус-Бека.

И. Айюбов

№ 14-15 (12149-150), шоатта, 2 фераля, 2019 шу / суббота, 2 февраля 2019 года

Добавить комментарий

Ваш e-mail не будет опубликован. Обязательные поля помечены *