Къоаламаца хозал кхайкаер

Iалама хозал ше ма ярра ювца ховр малав? Суртанча ва-кх! Долча бесса Iалама а, кхыча белгалон  а сурт доаржаде хар лакха начIал да, цхьацца болча наьха къаьста белгало я из. Цу тайпара белгало йоал суртанча волча Бештой Вахах. Из къахьегаш вола дукха ха я, ше къона вале а, из дикка гаьнаваьнна суртанча ва.
Вахас  Москве йоаккх дукхагIйола ха. Из цига вахаш ва. Цо эггара хьалха караберзабаь дешара никъ ба — ГIалгIай паччахьалкхен университете психолога дешар. Цул тIехьагIа цо цIе диплом даккхарца чакхъяьккхар художественни школа.
Сурт дилларцара чам совбоалар ежа уллаш га яйча а, лоамаш дайча а, е маьлхе хьесталу циск зийча а. Суртанчашта юкъе цо лакха лоархI  Мартазананаькьан Мувса. Вахас доаккхал ду ший кхоллама  вахаре цо дакъа лацарах. Дукха толамаш да цун вахаре. «Полет над Москвой» яхача суртах дола совгIат цо хьаийцар Китай мехкара посола кулг-бера.
Кхы а из дакъалоацаш хиннав Чикаго дIайихьача «Образы науки в живописи» яхача яхьарашка цIихезача лауреаташца. Вахий дукхагIдола сурташ Пушкински музее хьокха оттадаь да.  Цун суртий къаьста белгало я — гIалгIай хьисапаш а, гIалгIай гIаьрчож юкъе кхахьар. Дай-мохк бувцаш да цун дукхагIдола сурташ. Цо лелабу болх тайп-тайпарча дакъах ба: сюрреализм, наггахьа реализм, минимализм, абстракци, пейзаж.
Ше мел Iомадаьр Вахас декъ кхувшбоагIачарца. Къонача суртанчашта лаьрхIа цо хьайийлар Москве «FRAGMENT» яха къаьстача наькъашца  къоаламца болх бе Iомавеш йола школа. ХIаьта дIалела ца могаш дола бераш из цIагIа чуварга хьеж. Царца цо къаьста болх бу, уж болча дIа а ухаш. Царех эзди суртанчаш кхебе я цун керттера уйла:
— Кхоллама саг деррига ховш хила веза! — йоах Бештой Вахас. — Велавала а, маьлхара хила а, велавала бахьан доацача хана, дагар дар довзийташ. Уйлаш зовне хила еза. МоллагIа хIама карадерзадеш хила вицвала йиш яц саг!
Цудухьа ва Ваха, Iалама уйла а, сага уйла а дика кхетаеш, зувш. Цун кхоллама никъ, дIахо  дIа мел бода, дукха толамаш кхухьаргдолчарех ба.
Новрузнаькъан Макка

№ 16 (12151), шинара, 5 февраль, 2019 шу / вторник, 5 февраля 2019 года

Добавить комментарий

Ваш e-mail не будет опубликован. Обязательные поля помечены *