Лоаца дувцараш

Тха машена-м хIама даьдац

ТкъоалагIча бIаьшерен 80-гIча шерашка хиннад ер хIама. Цу хана вайцига нонагIо болх беш яр Т-150 яха йоккхий трактораш. Цхьан дийнахьа цу тайпарча тракторца кхай тIара Наьсаре водаш хиннав ши саг. Асфальта тIа гIолла уж боагIаш трактора тIехьашкара «Москвич-412» оала машен тIатехай. Трактора чIоагIача фаркопа тIакхийтта машен дикка йохаяьй. Шоай трактор юстара а яьккха, хозача гIулакха, эздела Iоваьннав трактористи цун новкъости. Легковой машен лоаллаш ваьгIачо аьннад:
— ХIанз фу дича бакъахьа да вай?
Трактор лоаллар йистхилалехьа, цун новкъосто жоп деннад:
— Тхачоа-м хIама даьдац, оаха шуга хIама яхац, — аьнна.

Масхам

ЙIайхача хана хьогама молаш хиннарех да масхам. Эрсий меттала квас ала мегаргда цох. ХIаьта гIаьбартоша «масхыма» оал цох. Из дош, вай царгара хьаийцад е цар вайгара дIаийцад яхар, сов лоархIаме дац аьнна хет сона. Нагахьа санна эрсаша кIих яьча маькхах хо* теха квас деш дале, вай масхам, коачча хьадаьча хьажкIий жувра хударах хьаду. Юххьанца жуврах даь коачча худар 30-35 минота кхехка а дий, мела даллалца сабар дича, из топпара е сир даьккхача пхьегIа чу йIайхача моттиге дIаоттаду. Цул тIехьагIа цох серми* дIатох. Из сайса хьалдаьлча чоп бужабу Iаг техе. Кхозза совсийт масхам. ТIаккха кхаьча доал из. Цул тIехьагIа кхыча пхьегIа чу дотт. ЦIаькха шозза хьадаьча коачача хударах масхам хьаде йиш я дисача хударах лонах санна пайда а эцаш. ДIахо масхам хьадеш хилча ло керда дIаболла беза серми а тохаш.

С. Заамиев
* Хо (б) — хмель
*Серми (б) — солод

№ 16 (12151), шинара, 5 февраль, 2019 шу / вторник, 5 февраля 2019 года

Добавить комментарий

Ваш e-mail не будет опубликован. Обязательные поля помечены *