Лом

«Хьайбаех дола гIалгIай фаьлгаш», оттадаьраш Д. Мальсагов, Б. Зязиков. Нохч-ГIалгIай книжни издательство, Грозный — 1961 шу.

Шинари, Iаьхари, борзи, чаи хиннад цхьаккха а хIамах цакхера вIаший барт баь. Из чIоагIо а яь уж дажаш доахкаш, хьунагIара ара а даьнна, лира цIогla детташ, уж кхераде гIерташ доагIаш хиннад лом. Мел чIоагIа цо мухь бетте а, шек доацаш дажаш даьхкад уж.
— Ойя, ераш сох вIалла кхера а мича лу. Ер фу дола-теш? — аьнна, хийттад лома.
Кхы а чIоагIагIа цIогIа а теха, го баьккхаб царна ломо. Бакъда, цхьаккха а цунгахьа дIахьожаш хиннадац. ХIаьта шинарий юкъах йоаллаш топ а хиннай.
— Ераш-м укх бIала сох кхерадала а дага дац, — аьнна, цхьа ха яьннача гIолла юхадоагIаргдолаш дIадахад лом.
Лом дIадахачул тIехьагIа лома оамалех шекдаьнна ераш, шоайла дага а даьнна, цхьан цIагIа чудахад, шоашца пандар а ийца. HaIapa юххе Iаьхар иллаб, цунна юхехьа теIаш хиннай борз; берза тIехьа шинар хиннад, цунна тIехьа ча хиннай. Пандар берзага хиннаб.
«Укх Iаьхара дулх ма мерза а, ма кIаьда а хургдар-кх», — яхаш йиш лекхаш хиннай берзо.
Берза ашара маIан дайзача чайво аьннад:
— Хьабал, борз, из пандар сога. Сона а ма ховра цхьа йиш.
Укх берза цIоках тIоарска ма дика хургдар, пхаьнех Iадсаькх ма чIоагIа хургдар-кх, — аьнна, йиш а лакхаь, берза тIатеIаьй ча.
Кхераенна борз араиккхай. Лом доагIаш дайна из еддай мотташ, вожаш а цунна тIеххьа аралийлхад. Дайдда долхаш цхьа боккха кхера а нийсбенна, цу тIа даьннад уж диъэ а. Цу ханна бирса мухь а бетташ дена хьаэттад лом.
— Сох цакхерар а малав, кхераргвоацар а малав? — яхаш цIогIа детташ хиннад ломо.
Кхерабенна гарре эгабеш лаьттача Iаьхара «Со Iобожа — боал», — аьннад.
— Боллачахьа латталахь, Iаьхар, — аьннад вокхар, — вай гучадоахаргда Iа.
Лом кхерий кIал кхоаччашехь, Iаьхар бежаб.
Лакхера чубена Iаьхар бIарга а байна, лом хьалхьожжашехь, кхераденна шинар а кхерий тIара чуденад. Шинара лаьтта кхоаччашехь цун юкъах яьлла топ яьннай.
— Ераш-м дий-теш сох кхералургдолаш а. Са тIом бац ер, — аьнна, дедда хьунагIа гIолла дIадахад лом.

Кийчдаьр МАТЕНАЬКЪАН Илез

№ 17 (12152), ера, 7 февраль, 2019 шу / четверг, 7 февраля 2019 года

Добавить комментарий

Ваш e-mail не будет опубликован. Обязательные поля помечены *