ГIалгIай Мехка керда эзди школа хьайийлай

3 гIат йолаш керда школа хьайийлай Мужеча. Цу чу хIара дийнахьа деша аьттув ба 320 бера. Школа хьаеллача вIашагIкхетаре дакъалоацаш бар ГIалгIайчен Мехкда Евкурнаькъан Юнус-Бек, РФ просвещени министр Васильева Ольга, Къилбаседа Кавказа гIулакхех вола министр Чеботарев Сергей, иштта школе болхбеш бола хьехархой, цига дешаш дола бераш, цар дай-ноаной, юрта бахархой.

Гулбеннарашта хьалхашка къамаьл деш йистхиннача министра Васильева Ольгас белгалдир, таханара ди, къаьстта берашта мел лерхIам болаш да. «Тахан кердача эздича школе дIачугIоргда шо. Цун юхе йисай дукхача шерашкахьа шун даьша а, ноаноша а, гаргарча наха а, юртхоша а дийша къаьнара школа. Из а хетаргахьа вай тархьара дакъа а хинна дIаоттаргья. Геттара дика ди да таханардар, хIана аьлча, Iилман ди долча дийнахьа хьаеллаш йолча укх школе дукха керда хIама довза аьттув ба вай. ДIахо бода вай никъ къоастабергба вайна, вай хьамсарча хьехархоша а даьша-ноаноша а», — аьлар Васильева Ольгас.
Ший оагIорахьа Кавказа гIулакхех волча министра Чеботарев Сергейс баркал аьлар мехка кулгалхошта шоай халкъ а, мохк а дукха дезаш къахьегаш хилар бахьан долаш. «Уж гIулакхаш бахьан гучаювл мехка эзди, тIехдика гIишлош. Аз-м къаьстта баркал аргдар Минпросвещени кулгалхочоа Васильева Ольгайна, дешара даькъе чоалхане латтача хаттарашкахьа лаьрххIа ше оарцагIа а яьнна цо теркам беш хилар бахьан долаш», — аьлар Минкавказа кулгалхочо.
Ший оагIорахьа паччахьалкхен министрашка моаршал а хоатташ царна баркал аьлар Мехкдас Баматгире Юнус-Бека, массайолча мехка лерхIамеча кхетачешка дакъа лоацаш, массаза а оагIо хьаллаца уж кийча хилар бахьан долаш.
«Дукха ха йоацаш хьежадар вай къаьнарча школага. Юрта юкъара совет а, хьехархой а кердача школага чIоагIа сатувсаш бар. Тешацар уж кастлуш керда школа вIаштIехьа ярг ма йий аьнна. ХIаьта тахан из йолаш я. Иштта укх юрта хьалъеш латт берий беш а. Хьаьшашка хоам бу аз укх шера шин сменах дола чоалхане хаттар иттех шера кхы дага дала дезаргдоацаш дIакъовла оаха, аьнна, — белгалдаьккхар Мехкдас министрашта.
Укх шералца юрта из къаьнаръяр мара кхы школа хиннаяц. Из хьалъяь хиннай 1957 шера гIалгIай СибрегIара цIабаьхкача хана. Цу хана из хьожаяь хиннай 90 дешара моттига, бакъда, кхы баха моттиг йоацаш цу чу шин сменах дешаш 300 совгIа бер хиннад. Школан доазон чубоагIаш, баскетбола а волейбола а стадион ба, иштта футбола поле а, кердача адара наькъаца кийчья гимнастически шахьарг а я. Берашта геттара доккха совгIат хиннад керда хьайийлача дешара гIишлох.

Матенаькъан Илез

№ 18-19 (12153-154), шоатта, 9 февраль, 2019 шу / суббота, 9 февраля 2019 года

Добавить комментарий

Ваш e-mail не будет опубликован. Обязательные поля помечены *