Iилмангахьа къахьийгарашта баркал оалаш

Февраль бетта 8 ди Россе паччахьалкхе, Iилман ди, аьнна белгалдаь дездеш да. Цу хьаькъе вIашагIкхетар дIадихьар Евкурнаькъан Баматгире Юнус-Бека ГIалгIай Мехкарча Iилманхошца.
Мехкдаь администрацен Iан цIагIа паргIатта дIа-хьа йист а хулаш дIадихьача вIашагIкхетаре Баматгире Юнус-Бека Iилманхошца дийцар тахан Iилман даькъе мехка латташ дола чоалхане хаттараш. Иштта цо белгалдир ГIалгIайчен тархьар мадарра хьагучадоаккхаргдолаш, Iилма дегIадаргахьа къахьегаргдолаш къона къахьегамхой а юкъе боалабе беза Iилман балхашта, аьнна.

«Массадолча хаттарашкахьа наьха вахаре хулаш дола моллагIа хувцамаш Iилманхой къахьегам боацаш вIаштIехьадоалаш дац. Цудухьа тахан вай мехка къаьстта теркам бу керда хьагучабувлача Iилманхошта а, царна балха моттигаш Iалашъяра а Iилмаи дешари даржаргахьа, керда кечалаш кхолларгахьа, иштта Iилманца бувзам а лоаттабу», — аьлар Мехкдас.
Чехкача боларах ГIалгIай Мехка хьинаре Iилма дегIадар доладеннад 1926 шера Iоахарнаькъан Элмарзий ЧхьагIий цIерагIа йола ГIалгIай Iилман-тохкама институт хьакхолларца. Института кулгалхочо БIархой Мустафай Нинас яхачох, тахан ГIалгIайчен Iилман-тохкама институт лерхIам болаш я шийна хьалхашка тархьара овлаш чIоагIдаргахьа декхараш увттадирца ерригача Россе а Кавказа а даькъе долча хаттарашкахьа дIахьош долча балхашца.
«ГIалгIай Мехка керда Iилман болхлой Iалашбаргахьа хьинаре къахьегаш я институт. ДIадахача шин шера шиъ кандитатскии, иштта шиъ докторскии диссертаций зашиташ хиннай. Института Iилманхоша доххьал 2018 шера 16 Iилман форумашка дакъалаьцад Россе а цун доазол арахьа а. Къаьстта кIатбу институто Iилман балхаш арадахаргахьа. 2017-2018 шерашка 60 Iилман къахьегама балхаш арадайнад», — аьлар БIархой Нинас.
Иштта Нинас белгалдир, гIалгIай Iилма дегIадоаладаргахьа долаш долча толамех кхоачам баь ца а Iеш, ГIалгIайчен Iилман-технически къахьегама закон дарахи, иштта ГIалгIайчен Iилма дегIадоладара программаш овттаярахи бола болх ца бича баргбоацаш ха хьаэттай, аьнна.
ДIахо ГIалгIай мехка Iилма алсамдаларгахьа къахьийгача Iилман болхлошта баркал а аьнна, царна лерхIаме грамоташ йийкъар Мехкдас.
«Хала дар аьнна, юха ца довлаш, Iилман даькъе боагIа болх дIачакхбоаккхаш оаша къахьегар бахьан долаш, укх цIай долча дийнахьа шо дерригаш а дег чура даькъал дувца лов сона. Ираз, аьттув болаш, ди тIехьа Iилмангахьа керда оагIонаш гучаяхарца толамаш доахаш шоай балха говзал лакхъеш дIачакхдовла аьттув болба шун», — аьлар Евкурнаькъан Юнус-Бека.

И. Айюбов

№ 18-19 (12153-154), шоатта, 9 февраль, 2019 шу / суббота, 9 февраля 2019 года

Добавить комментарий

Ваш e-mail не будет опубликован. Обязательные поля помечены *