Коталон да

«Олимпийский чемпион» яха цIи чIоагIа еза а хьамсара а хеташ лелаю из шоашка кхаьчача наха. Къаьстта гIалгIаша, моллагIа шоай къамах саг цу лагIа тIа ваьлча, шоай массане а лоархI из моттиг. Къаман яхь я из. Массехк саг ва гIалгIашта юкъе цу дарже кхаьча из цIи лелаеш. Низъоамала даькъе сага тIеххьара йоаккхаш йола тIехйола котало я из.

ГIалгIаш-х эггара хьалха из котало яьккхарца ший а, Россе а, ший къаман а цIи дунен дIайовзийтар Арсмакнаькъан Мухьмада Исраил ва. Из ваьв 1962 шера февраль бетта 8 дийнахьа. «Тяжелая атлетика» яхача даькъе хьинаре къахьегарах ваьннав Исраил ший нийсархошта хьалха. Цун еннай 1988 шера «Заслуженный мастер спорта СССР» яха цIи. СССРа а Европа а чемпион, дунен чемпионата призёр, олимпийский чемпион ва из.
Ше нийсвеннача наха юкъе лоархIам болаш а, везаш а саг хиннав Исраил массаза а. ДIахо шоана йовзийта лов сона, гIалгIай йоазонхочо Чахкнаькъан Идриса СаIида ше кхалхале хьалхха цох язъяь стихотворени. Ала деза ер стихотворени хьалхара кепатохаш я, аьнна.

Шоана лоамаш – сиглен лагIаш,
Седкъий цхаралаш тIатухк,
Цхьанне алац – хайша дагIа,
Цхьанне алац дийша ухк.

Селхан, тахан, иштта кхоана,
ВIалла, вIалла ца луш кIаьд,
Даим латта диллад шоана, –
Даиман шо уралатт.

Адамашта хет шо дийна.
Цецвувл шевар, бIаргагуш,
Ший кхоален чу замо хьийна.
Шун моакхаза дегIамаш.

Наькъа водар ваьннав гаьна.
Болат хьахул, сага лой.
Да, да хургвац, нана – нана,
Бераша цар сий ца дой.

Цхьабоа нах бах алхха шоашта.
Цар шоай турпал лархIац хийла.
Иштта вицвеннав гIалгIашта
Арсамаков Исраьила.

Чахкнаькъан Идриса СаIид
15.10. 2008 шу.

Йоазонхочо ма аллара ба адамашта юкъе нах, аллха шоашта бахаш. Бакъда, шийна вахарал совгIа шийна гонахьарча наха йIовхал мехкаеш, цар вахарца ийна вахача сага сий а ду, лерхIам а бу наха. Исраил мо бола коталон дай дуккха хилба вай.

Матенаькъан Илез

№ 20 (12155), шинара, 12 февраль, 2019 шу / вторник, 12 февраля 2019 года

Добавить комментарий

Ваш e-mail не будет опубликован. Обязательные поля помечены *