Дог майра пхьагал

«Хьайбаех дола гIалгIай фаьлгаш», оттадаьраш Д. Мальсагов, Б. Зязиков. Нохч-ГIалгIай книжни издательство, Грозный — 1961 шу.

Цкъа той а даь, дерригача хьуна оакхарашка кхайкад лом. Гулденнача оакхараша лом шоай шуна тхьамадалла харжад. Малара кадаш текъадеш, лом хестадеш хиннад гулденнараша.
Массарел а тIехьагIа хьоашалгIа ена пхьагал хьачуяьлча лом чIоагIа цецдаьннад из тIехьаяларах. Массане а зийнай пхьагал. Аркъал даха дела а денна вира лерге даха, цунга йоахар дувцаш доаллаш хиннад цогал! Кхы мел долча оакхарел хьакхаштагIа долча цогало аьннад:
– НаIар-тIехьашкара хьа а яьле, лома хьалхашка бехказа яла. Фу деш латт хьо бIаргах саьрг кхийтача санна, бIарга чу бий а хьувзабеш?!
Шийна гIода бенна кад халла хьал а айбаь, бехк ца баккхар дийхад пхьагало.
Хьаьший диаь-менна дог дика хилча гIapaш e баьннаб. Къамаьла цаI вокхал тIехвала гIийртав. Цудухьа тхьамада той хоададаьд. Хьаьший цIенгахьа леста баьннаб.
АргIанца боацаш массехк кад меннача пхьагала дегI дIоахденна хиннад, бIарга цIи сийрдаяьннай, дог майралла детталуш хиннад. Лом долча хьоашалгIа дIайодаш кхераш гош эгаш яхача цун – хIанз цIайоагIаш цхьаккха хIамах бIукъажаш хинна бац. Шийна улуврча бертех вIалла кIаттIа а хийттабац цунна, кхыметтел ломах лата а кийча хиннай.
Меннача маларо корта бIогора баьккха пхьагал наькъах тувлаеннай, цхьабакъда хIамах кхераш хиннаяц. Эггара хьалха шийна нийсъеннача лай токхорах къорг а яьккха, гIoгI хийцца йижай пхьагал. Цхьабакъда, тIехьа ихача берташа пхьагал яа лерхIаш хиннад.
– Со чIоагIа меца я, – аьннад цхьанне, – Iа сабар де, са тоха. ШоллагIа нийсъеннар хьа хургья.
– Айя, мичара, – аьннад вокхо, – ер санна яр корайоагIаргьяц. Гой хьона, цунах хьаетталу хьаж!
Бертий пхьагал яа барт кхийттабац. Летай уж шоайла. Ше бахьан долаш селла лира тIом латташ а пхьагал вIалла сома а яьннаяц. Дорхъенна, вIаший эгIазъяха, шоайла латаш яйна дIаяьннай бертий.
Са хуллаш корта лазарах сомаяьнна пхьагал урахайча гонахьа яйна ядаш бертий бIаргаяIйнай цунна.
– Раббана-яI! Ма во хIама доад-кх из малар а! Вехаьча сага карах ца доалаш фу дусаргда. Ераш берти маца йоаяь йола аз? — яхаш, ура а хайна кIоаргга уйлаш еш яьгIай дог майра пхьагал.

№ 21 (12156), ера, 14 февраль, 2019 шу / четверг, 14 февраля 2019 года

Добавить комментарий

Ваш e-mail не будет опубликован. Обязательные поля помечены *