ГIалгIай культура аьттон наькъаш

Укх тIехьарча шоатта дийнахьа февраль бетта 16-ча дийнахьа Йоккхача Ачалкхе Культура цIа хьаделлаш той хиннад. Кердача, «Россе культура» оалача Федеральни целевой программас гӏо а деш хьалъяьча гIишло чу концертни зал я 200 моттиг хьажархошта лаьрхӏа йолаш. Иштта йоккха сценически майдангаш а, мастерскойш а Iалашъяьй. Укхаза торо хургья дукхача наха дакъа лоацаш йола культурни мероприятеш, кружкови занятеш дIакхьахьа, халкъа ремесло хьеха.

Культура цIа хьаделлаш дакъалоацаш вар ГIалгIайчен Мехкда Евкурнаькъан Юнус-Бек.
– Кердача культура цIеношка, хIанзолца хиннача бесса, хореографически кружоки, вокала студии хинна ца Iеш, кхыдола бераш а боккхий бараш а культура юкъе чуоза, творчески дегIааха, дезала салаIа аьттув хилар аз нийс лоарх, – аьлар Баматгири Юнус-Бека.
Цул совгIа, Мехкдас культура цIеношка амар дир укх шера дIахьош дола Театра шераца хьалхарча дийнахьа денз дакъалаца, аьнна.
– Театральни искусство юртара бахархошта дика йовзийта еза: кегийча наха а, кхувш боагIачарна а, – тIатехар цо.

Культура министр волча Базоркин Микаэла ма аллара, хIара кердача Культура цIагIа конкурса муниципальни этапаш дIахьоргья, цул тIехьагIа региональни хургйолаш. «Духхьал укх Культура цIагIа дIайолаю оаха кердача конкурса пилотни проекта муниципальни этап, мехка мелдолча культура цIеношта юкъе из дIакхухьаргйолаш. Цун цIи хургья «ГIалгIай халхара конкурс» («Конкурс ингушского танца»). Амма, из халхар вайна тахан довзача кепара а доацаш, вай къаьнарча Iаьдала эздела бокъонашца хургда, шийгахьа зоахалолашш а деш. ХIана аьлча, гIалгIай халхар, духхьал маьженаш лелаер хинна Iац, из ший кепара шин сага юкъера къамаьл да», – аьлар Базоркин Микаэло.

Х. ЭГИ

№ 24 (12159), шинара, 19 февраль, 2019 шу / вторник, 19 февраля 2019 года

Добавить комментарий

Ваш e-mail не будет опубликован. Обязательные поля помечены *